Коронавирус дьаҥын бохсууга үлэлэһэр Тааттатааҕы суһал ыстааптан иһитиннэрбиттэринэн, бэс ыйын 6 күнүгэр, биир киһи туруга үчүгэй буолан, балыыһаттан тахсыбыт.
—Балаһыанньа улууспутугар көнөрүн туһугар үлэ тиһиктээхтик тэриллэр. Балыыһаттан тахсыбыт дьон дьиэлэригэр салгыы хааччахтанан олоруу эрэсиимин тутуһаллар. Оттон бүгүҥҥү, бэс ыйын 7 күнүнээҕи туругунан, түөрт киһи балыыһаҕа эмтэнэ сытар. Сэттэ киһи — обсерваторга. 40 киһи дьиэлэригэр хааччахтанан олороллор.
Сайын саҕаланан, куораттан улууска сайылыы, сынньана кэлии элбэх. Нэһилиэктэргэ хастыы киһи кэлбитин туһунан иһитиннэриилэр киирэ тураллар, бу боппуруос хонтуруолга тутуллар. Маныаха улуус баһылыгын ыам ыйын 7 күнүгэр тахсыбыт 359-с №-дээх дьаһалынан, атын сиртэн кэлбит дьон уонна дьиэлээхтэр хааччахтанан олоруу эрэсиимин булгуччу тутуһуохтаахтарын туһунан санатыы, өйдөтүү үлэтэ ыытылла турар. Маны сэргэ, айаҥҥа ирдэбиллэри тутуһуу булгуччулааҕын, массыынаҕа мааскалаах, бэрчээккилээх буолаллара, бэйэ икки ардыгар дистанцияны тутуһаллара ирдэнэрин туһунан сэрэтиилэр иһитиннэрэр-биллэрэр сириэстибэлэринэн тиһиктээхтик тарҕатыллаллар.