Тааттаҕа, кэнники хонукка, үс киһи коронавирус дьаҥар хаптарбыт

Коронавирус дьаҥын бохсуу үлэтэ салҕанар. Саха сиригэр бэҕэһээҥҥи чахчынан, уопсайа,  2753 киһи ыалдьыбыта бэлиэтэммитэ. Кэнники күннэргэ ыалдьааччы ахсаана, иһитиннэрбиттэринэн, 60-70 иһинэн-таһынан диэххэ сөп.  Үтүөрээччи ахсаана сыыйа элбиир. Күн бэҕэһээ 100 киһи балыыһаттан тахсыбыта бэлиэтэммитэ.  

Оттон улуустарга балаһыанньа хайдаҕый?  Тааттаттан улуустааҕы суһал ыстаап иһитиннэрдэ.

—Бэс ыйын 11 күнүнээҕи туругунан, балыыһаҕа 7 киһи эмтэнэ сытар. Итинтэн үһэ оҕо. Обсерваторга билигин 9 киһи баар. Дьиэлэригэр 36 киһи хааччахтанан олорор. Оттон кэнники сууккаҕа 3 киһи анаалыһа коронавирустаабытын көрдөрдө.

Ыам ыйын 16 күнүттэн  бүгүҥҥү күҥҥэ диэри, улууска коронавирус дьаҥар хаптарбыт киһи ахсаана барыта — 12.   Итинтэн икки киһи дьаҥҥа сыһыарааччы  буолбуттар. Кинилэргэ дьаҥ сибикитэ суох. Итинтэн аҕыс киһи кэлии дьонтон, биир куорат балыыһатыттан сыстыбыттара быһаарыллыбыта.

Дьаҥнаабыт 12 киһиттэн 9 улахан киһи, 3 оҕо.

Обсерваторга киирбит киһи уопсай ахсаана — 34.  Ыалдьыбыттары кытары хантаактаһан дьиэҕэ хааччахтанан олорор дьон уопсай ахсаана 471 киһиэхэ тиийдэ. Дьиэ кэргэн иһигэр сыстыы — 3.

Ыалдьыбыттартан үтүөрэн балыыһаттан барыта 5 киһи таҕыста. Улууска статистика көрдөрөрүнэн, ыалдьыбыт дьон үксэ кэлии дьонтон  сыстыбыттар. Онтон кэлэктиипкэ, дьиэ кэргэҥҥэ сыстан ыалдьыы көстөр.  Маныаха бу дьаҥҥа оҕолор да, улахан да дьон хаптарыахтарын сөп.

Ыарыы бастакы сибикилэринэн буолаллар: температура үрдээһинэ, күөмэй ыалдьыыта, сөтөл, сэниэтэ суох буолуу, сыты билбэт буолуу.

Биир дойдулаахтарбытыгар бука бары мааскалаах, бэрчээккилээх сылдьалларыгар, бэйэ икки ардыгар дистанцияны тутуһалларыгар өйдөтүү үлэтэ тиһиктээхтик салҕанар, биллэрии күннээҕинэн бара турар. Кэлбит дьон ирдэбили булгуччу тутуһалларыгар, дьиэлэригэр олороллоругар сүбэлээһин эмиэ ыытыллар. Бука барыларыгар ыарыйдыгыт да, тута, бырааһы ыҥырыҥ диэн этэбит, — диэн иһитиннэрдилэр.