Саха АССР 100 сыла Уопсастыба

Тааттаҕа «IIS.UUS.AS fest» этнографическай бэстибээл ыытылынна

Бэс ыйын 10-12 күннэригэр Таатта улууһун Чөркөөҕөр «IIS.UUS.AS fest» этнографическай бэстибээл түһүлгэтэ буолан ааста. Манна «Ытык ымыым – хомуһум” диэн хомус уустарын икки ардыларыгар, кылтан, сиэлтэн, туостан, муостан, туойтан, талахтан оҥоһуктарга, ону сэргэ “Үрүлүйэр үрүҥ аспыт барахсан” диэн асчыттар түһүлгэлэригэр анаммыт улахан тэрээһин буолла.

Гаврил Вырдылин, Таатта улууһуна култууратын салайааччыта:

— Бу күннэргэ биһиэхэ улууспутугар, Чөркөөх мусуойугар аан бастакытын ыытыллар өрөспүүбүлүкэтээҕи бэстибээл буолан ааста. Тоҕус улуустан, куораттан кытыннылар. Эспиэртэр кэлэн үлэлээтилэр. Биһиги ааҕыыбытынан 2500 киһи сырытта. Иис, уус, ас хайысхаларынан күрэхтэһиилэр буоллулар. Бу бэстибээли Саха АССР 100 уонна Таатта улууһун 110 сылларыгар анаан ыыттыбыт. Тэрээһиммит сүрүн үбүлээччитинэн СӨ култууратын уонна духуобунай сайдыыга министиэристибэтэ, улууспут дьаһалтата, Ил түмэн дьокутаата Виктор Лебедев, нуучча географическай уопсастыбата, Ярославскай аатынан саха түмэлэ уонна Октябрьскай нэһилиэк дьаһалтата буолаллар. Тэрээһиҥҥэ анаан былырыын икки оһох тутуллубута. Ол курдук, биирэ тимири уһаарар, иккис  туойу «буһарар» диэн.

Улууспут аҕыс нэһилиэгэ кэлэн, бэстибээлбит аһыллыытын, куонкурустарбытын тэрийэрбитигэр күүс-көмө буоллулар. «Саха НКИХ”, Е.Ярославскай аатынан мусуой үлэһиттэрэ тэрээһиммитин сырдаппыттарыгар, күүс-көмө буолан көмөлөспүттэригэр уонна улууспут дьонугар-сэргэтигэр, түгэнинэн туһанан, махталбытын тиэрдэбит. Бу тэрээһини эһиил Уһук Илин  уокуругун талааннаах дьонун түмэн, тэрийэри былаанныыбыт.

 

 

Таатта улууһун норуот айымньытын киинин архыыбын хаартыскалара туһанылыннылар.

 

 

 

 

.

0
0
Telegram @edersaas20