Таатта улууһун Ытык Күөл бөһүөлэгэр кулгаахтарынан истибэттэр уонна мөлтөхтүк истэр дьон хары баттаһыытыгар күрэхтэстилэр. Бу туһунан улуустааҕы АФК (адаптивнай физическэй култуура) исписэлииһэ Василий Мордовской, улуустааҕы инбэлииттэр уопсастыбаларын бэрэссэдээтэлэ Н.С.Белолюбская иһитиннэрдилэр.
— Уопсайа 18 спортсмен кыттыыны ылла. Бары оҥостон, бэлэмнэнэн кэлбиттэрэ күрэхтэһиини сытыырхатан биэрдэ. Эр дьон үс ыйааһыҥҥа күөн көрүстүлэр. 65 кг диэри ыйааһыннаахтарга Василий Габышев бастаата. 65 кг үөһэҕэ Максим Потапов кыайда. Бэтэрээннэргэ Прокопий Варламов чөмпүйүөннээтэ. Дьахталларга 60 кг диэри ыйааһыннаахтарга Дария Габышеа кыайда-хотто. 60 кг үөһэҕэ Валентина Кулаковская чөмпүйүөн үрдүк аатын ылла, — диэн кэпсээтилэр.
Тэрээһини арыйыыга улуустааҕы социальнай харалта упралениетын салайааччы Михаил Тарасов, улуустааҕы инбэлииттэр уопсастыбаларын бэрэссэдээтэлэ Надежда Белолюбская эҕэрдэлээбиттэр, спортсменнарга ситиһиилэри баҕарбыттар. Кулгаахтарынан инбэлииттэр ( бэрэссэдээтэл Саргылана Павловна Романова), доруобуйаларынан хааччахтаахтар уопсастыбалара (бэрэссэдээтэл Надежда Семеновна Белолюбская) уонна бу уопсастыба исписэлииһэ Элеонора Васильевна Маркова күрэхтэһиини көмөлөөн ыыппыттар.
Күрэхтэһиигэ кыттыбыт дьон тэрийээччилэргэ махтаммыттар. Тыа сирин дьонугар маннык көрсүһүүлэр ыытыллаллара наадалааҕын ыйбыттар.
Биһиги корр., «Саха» сирэ хаһыат, edersaas.ru