Таатта улууһугар үөрүүлээх быһыыга-майгыга элбэх оҕолоох ыалларга дьиэ сэртипикээтин туттардылар. Бу туһунан Таатта улууһун Үлэҕэ уонна социальнай көмүскэлгэ управлениетын салайааччы Михаил Петрович Тарасов кэпсээтэ:
— Таатта улууһугар элбэх оҕолоох 74 ыал баар. Онтон бүгүн уон ыалга уопсайа 44 мөлүйүөн солкуобайга сэртипикээттэри туттардыбыт. Ол курдук, биирдии ыалга — 4 мөлүйүөн 900 тыһыынчалыы солкуобайга тиийэ суумаҕа. Саамай элбээбитэ алта мөлүйүөн солкуобайдаах сэртипикээти ыллылар.
Биэстэн элбэх оҕолоохтору дьиэнэн хааччыйыы диэн бырагыраама 2012 сылтан үлэлиир. Ил Дархан Айсен Николаев Анал этиитигэр биэстэн элбэх оҕолоох дьиэ кэргэни дьиэнэн хааччыйыы бырагырааматын күүскэ үлэлэтэбит диэн этэн турар.
Өрөспүүбүлүкэ үрдүнэн маннык дьоһун көмөнү 124 ыал, биһиги улууспутугар 10 ыал ылла: Туора Күөлтэн — түөрт ыал, Дэбдиргэттэн — түөрт ыал, Ытык Күөлтэн — биир ыал уонна Уолбаттан — биир ыал.
Ульяна ЗАХАРОВА.