Доруобуйа Сүрүн

Тааттаҕа — ийэ, оҕо туһугар анаммыт бырайыак

Таатта улууһугар доруобуйаҕа, чэгиэн буолууга туһуламмыт «Здоровое будущее» бырайыак саҕаланыа.

СӨ Ил Дархана Ил Түмэҥҥэ Анал этиитигэр 2022 сылы Ийэ сылынан биллэрбитэ. Маныаха тирэҕирэн, «Биир ньыгыл Арассыыйа» баартыйа Саха сиринээҕи салаата «Здоровое будущее» бырайыак чэрчитинэн оҕолонор ийэни уонна кырачааны өйөөн маннык бырайыагы саҕалыыр.

 

Ийэ сылын чэрчитинэн, «Биир ньыгыл Арассыыйа» баартыйа Тааттатааҕы салаата бырайыакка бастакы хараҥаччынан буолла. Бырайыагы «Төлөн» ААУо Тааттатааҕы чоҕу хостуур тэрилтэ, ону сэргэ биир дойдулаахтар түмсүүлэрэ өйүүллэр. Тэрилтэ бырайыагы олоххо киллэрэргэ биир мөлүйүөн солкуобайынан көмөлөстө. Маныаха Таатта оройуонун киин балыыһатыгар учуокка турбут оҕолонорго бэлэмнэнэр ийэлэргэ биир кэмнээх эбии төлөбүр оҥоһуллуохтааҕын туһунан этиллэр.

«Биһиги Арассыыйа бэрэсидьиэнэ Владимир Путин уонна 2022 сылы Ийэ сылынан биллэрбит СӨ Ил Дархана Айсен Николаев көҕүлээһиннэрин сүргэбит өрө көтөҕүллэн туран өйүүбүт. Кэлэр кэнчээри ыччаппыт доруобуйатын эрдэттэн толкуйдуох тустаахпыт. Тааттаҕа оҕолоноору сылдьар учуокка турбут 100 ийэҕэ  10-нуу тыһ. солк. биир кэмнээх төлөбүр оҥоһуллуута өйөбүл буолуоҕа «, — диэн «Биир ньыгыл Арассыыйа» улуустааҕы салаатын политсэбиэтин чилиэнэ, «Төлөн» ААУо генеральнай дириэктэрэ Прокопий Рахлеев санаатын үллэһиннэ.

Баартыйа эрэгийиэннээҕи салаата «Здоровое будущее» бырайыагы олоххо киллэрэргэ, хас биирдии оройуон уратытын учуоттаан былааннаабыт.

«Саха сирин олохтоохторугар хаачыстыбалаах мэдиссиинэ көмөтө барыларыгар кыалларын ситиһиэх тустаахпыт,  успуордунан дьарыктанар усулуобуйаны тэрийиэхтээхпит уонна өрөспүүбүлүкэ олохтоохторо чэгиэн олоххо тардыһыыларын көҕүлүөхтээхпит. Сыалбыт-сорукпут, киһи олоҕо, үйэтэ уһуурун, нация чөл, чэгиэн буоларын ситиһии буолар«, — диэн этэр «Биир ньыгыл Арассыыйа» баартыйа эрэгийиэннээҕи салаатын салайааччытын э.т. Руслан Платонов.

«Здоровое будущее» бырайыак былаана киэҥ далааһыннаах. Арассыыйа нэһилиэнньэтин доруобуйатын харыстааһыҥҥа туһуламмыт национальнай бырайыактары кытары дьүөрэлэһэр.

0
0
Telegram @edersaas20