Тааттаҕа Ытык Күөлгэ дьиэ кэргэнинэн волейболга күрэхтэһии аан маҥнай ыытылынна. Бу туһунан биһиэхэ улуустааҕы култуура управлениетын салайар Гаврил Вырдылин иһитиннэрдэ.
—Икки күннээх күөн күрэскэ улуус нэһилиэктэриттэн 19 хамаанда кытынна. Хамаанда састаабыгар биир бэтэрээн-спортсмен, биир оскуола оҕото, икки дьахтар, үс эр киһи оонньууллар. Күрэхтэһиини Таатта улууһун волейболга федерацията (салайааччы улуус баһылыгын 1 солбуйааччы И.И.Потапов) иилээн-саҕалаан, көҕүлээн, тэрийэн ыытта. Дьон-сэргэ көхтөөхтүк кытынна. Спортсменнардыын, көрөөччүлэрдиин бука бары улаханнык астыннылар. Онон федерациябыт сылын аайы маннык күрэхтэһиини өссө кэҥэтэн, сайыннаран тиһиктээхтик ыытарга сыал-сорук туруорунна.
Күүрээннээх күрэхтэһии түмүгүнэн, эрбии тииһин курдук эгил-тэгил киирсии кэнниттэн Туора Күөлтэн кыттыбыт Хаптагаевтар хамаандалара бастаан кыайыы өрөгөйүн туттулар. Иккис миэстэҕэ Ытык Күөлтэн волейболу сөбүлүүр Пономаревтар таҕыстылар. Үһүс бириистээх миэстэҕэ Уолбаттан Рахлеевтар тигистилэр.
Таатта дьоно-сэргэтэ дьиэ кэргэттэр мустан күрэхтэһиилэрин улаханнык биһирээбиттэр, сэргээбиттэр. Дьиэ кэргэнинэн күрэхтэһии, бастатан туран, ыалы, аймаҕы сомоҕолуурун, нэһилиэктэри хардарыта ыкса сибээстээх оҥорорун, улуус олохтоохторо түмсүүлээх буолалларын, спордунан, физкультуранан дьарыктаныы, чөл олоҕу тарҕатарга улахан бигэ тирэх, көмө буоларын бэлиэтээбиттэр. Эһиилги күрэскэ өссө элбэх ыал ох курдук оҥостон, кустук курдук куоһанан кэлэн кыттыах, холонон көрүөх баҕата улааппыт.
Биһиги корр., «Саха сирэ» хаһыат.