Тааттаҕа бастакы көҕөн бултанна

Бөлөххө киир:

Таатта улууһугар бүгүн, муус устар 27 күнүгэр, бастакы көҕөнү бултаабыт дьону чиэстээтилэр.

Ол курдук «Бастакы көҕөн» аахсыйа улууска тэриллибитэ номнуо сэттис сыла. Бу туһунан Таатта улууһун баһылыгын солбуйааччы Егор Ноенохов санаатын үллэһиннэ:

— Бу бастакы көҕөнү бултааһын аахсыйатын улууспут баһылыга Михаил Михайлович Соров төрүттээбитэ. Урукку өттүгэр бастакы бөдөҥ көҕөн диэн буолара. Быйылгы тэрээһин арыый уратылаах. Ол курдук, айылҕа харыстабылын сокуонугар уларыйыы бөҕө киирэн биһиэхэ кус көҥүлэ муус устар 21 күнүттэн саҕаламмыта. Ол эрээри бу болдьоххо  «подсадной» кустаах уонна онно көҥүллээх эрэ дьон бултууллар. Онон быйылгы тэрээһиммит ити сокуоҥҥа олоҕуран ыытылынна.

Бастакы көҕөнү  бултаабыт уолаттар Егор Татаринов уонна Сергей Кириллин буоллулар. Кинилэр бастакы кустарын 92 саастаах Дмитрий Родионович Софроновка бэлэхтээтилэр. Иккис бултуйбут дьонунан Коля Доргуев, Олег Осипов, Евграф Кривошапкин буоллулар. Кинилэр бултарын эмиэ улууспут ытык кырдьаҕаһыгар Ульяна Федоровна Неустроеваҕа, сэрии огдооботугар, тыыл бэтэрээнигэр тиксэрдилэр. Ульяна Федоровна Борис Федорович Неустроев — Мандар Уус бииргэ төрөөбүт эдьиийэ. Бүгүн үөрүүлээх быһыыга-майгыга кыайыылаах уолаттарга улуус баһылыга бириистэри туттартаата. Ол курдук бастаабыт уолаттар икки миэстэлээх тыы уонна булуок ботуруоҥҥа тигистилэр. Оттон иккис миэстэлээх уолаттар ботуруоҥҥа тигистилэр. Бэлиэтээн эттэххэ, урут бириискэ эрэһиинэ тыы бэлэхтэнэр эбит буоллаҕына, быйыл урбаанньыттар оҥорор пластик бөҕө-таҕа тыылара бэрилиннэ.

Ульяна Захарова.

Хаартыскалар Егор Ноенохов түһэриилэрэ.

+1
0
+1
0
+1
0
+1
0
+1
0
+1
0
+1
0