Саха сирэ киһини да, сүөһүнү да эмтииргэ туттуллар араас отунан баай.
edersaas.ru
Кылгас сайын устата күүстээх күн уотун иҥэринэн, ситэр буоланнар, Саха сиригэр үүнэр эмтээх оттор соҕуруу дойдуга үүнэр эмтээх оттордооҕор быдан күүстээхтэр. Саамай сүрүнэ, хаачыстыбаларын сүтэрбэт туһугар, хомуллар уонна хатарыллар кэмнэрин сөпкө тутуһар ирдэнэр.
Таатта улууһун Баайаҕа нэһилиэгин бэтэринээринэй лечебницатын үлэһиттэрэ – О.И. Бурнашева уонна А.Е. Мандарова эмтээх оттору ынах сүөһүнү эмтиир үлэлэригэр көдьүүстээхтик туһаналлар. Кинилэр бу күннэргэ чэй буолар кучуну (лат. Chamaenérion angustifolium) уонна аһаҕас бааска көдьүүстээхтик туһаныллар тыһыынча сэбирдэхтээх (лат. Achilléa millefólium) оттору хомуйа сылдьаллар.
Биллэрин курдук, кучу от өрөспүүбүлүкэ бары улуустарыгар үүнэр. Сэбирдэҕэ, сибэккитэ, үнүгэһэ барыта туһаныллар. Хаан барыытын тохтотор, иһи-үөһү ыраастыыр, бааһы үтүөрдэр, утуйарга уонна төбө ыарыытын аһарарга эмиэ туттуллар. Сибэккилээн турар кэмигэр, от уонна атырдьах ыйдарыгар хомуйуллар, сөрүүн сиргэ хатарыллар. Оттон аһаҕас бааска көдьүүстээхтик туһаныллар тыһыынча сэбирдэхтээх сибэкки бааһы оһорорго көмөлөһөр. Бу туһунан Бэтэринээрийэ департамена иһитиннэрэр.
Раиса Сибирякова, «Саха сирэ» хаһыат, edersaas.ru