Коронавирус дьаҥын бохсуу үлэлэрэ ханна да тиһиктээхтик салҕаналлар. Таатта улууһугар бүгүҥҥү балаһыанньаны улуустааҕы суһал ыстааптан иһитиннэрдилэр.
—Бэс ыйын 2 күнүнээҕи туругунан балыыһаҕа киирбит киһи ахсаана — 9. Анаалыстарын түмүгүнэн 7 киһи коронавирус дьаҥар хаптарбыта биллибитэ. Бүгүҥҥү күн туругунан обсерваторга 4 киһи сытар. Оттон 54 киһи бэйэтин хааччахтанан дьиэтигэр олорор.
Ыам ыйын 13 күнүттэн саҕалаан, «Тааттаавтодор» АУо 13 үлэһитэ обсерваторга, 23 үлэһитэ дьиэлэригэр, ону сэргэ бу дьон барыларын дьиэ кэргэттэрэ дьиэҕэ хааччахтанан олоруу эрэсиимин кытаанахтык тутустулар. 36 үлэһит туруктара үчүгэй буолан, бэс ыйын 1 күнүттэн үлэлэригэр таҕыстылар.
Бэс ыйын 1 күнүттэн оскуолалар, эбии үөрэхтээһин тэрилтэлэрэ оҕолорго эбии дьарыктары күргүөмнээхтик саҕалаатылар. Улуус педагогтара оҕо дьиэҕэ олорор кэмигэр билиитин-көрүүтүн хаҥатарыгар анаан араас хайысханан проектнай үлэлэри, сатабылы сайыннарыыга дьарыктары ыыталлар. Бу үлэлэр тиһиктээхтик салҕаныахтара, оҕо-аймах болҕомтотун тардыахтара диэн эрэнэбит.
Улууспут дьонугар-сэргэтигэр дьиэлэриттэн тахсалларыгар мааскалаах, бэрчээккилээх буолалларыгар, уопсастыбаннай миэстэҕэ, маҕаһыыҥҥа бэйэ икки ардыгар тэйиччи сылдьыахтаах ирдэбили тутуһалларыгар, доруобуйаларын харыстаналларыгар, атыттары харыстыылларыгар, ыарыыны бохсор туһугар туох баар ирдэбили кытаанахтык тутуһалларыгар өйдөтүү-сэрэтии үлэлэрэ тиһиктээхтик салҕаналлар.