Таатта улууһугар ыччат салаатын көҕүлээһининэн ийэҕэ анаммыт дэкээдэ ыытылла турар. Бүгүн, алтынньы 16 күнүгэр, улуус социальнай көмүскэлин управлениетын салайааччы Михаил Тарасов элбэх оҕолоох ийэлэри кытта быһа эпииргэ кэпсэттэ.
Быһа эпиир ийэлэр ханнык көмөлөр, чэпчэтиилэр баалларын сиһилии билэллэригэр туһуланна. Салайааччы Михаил Тарасов бу туһунан санаатын үллэһиннэ:
— Улууспутугар маннык быһыылаах быһа эпиир бастакытын буолла. Онон бастакы буолан, уопсайа 50 ийэ кыттыыны ылла. Сүрүннээн үчүгэй сибээстээх буолан Ытык Күөлтэн быһа сибээскэ таҕыстылар. Быһа эпииргэ ийэлэри ордук 3-7 саастаах оҕолорго төлөнөр босуобуйа, элбэх оҕолоох ийэлэргэ ханнык чэпчэтиилэр бааллара долгутара көһүннэ.
Бэлиэтээн эттэххэ, мин улууһум элбэх оҕолоох ийэлэрин батсаапка баар бөлөхтөрүгэр баарбын. Онно 250 ийэ баар. Бүгүн суотабайым нүөмэрин биэрдим. Ийэлэр хаһан баҕарар долгутар ыйытыыларыгар, сытыы боппуруостарыгар аһаҕастык эппиэттиибин, сүбэлиибин. Маннык быһа эпиир кэлэр өттүгэр элбэхтэ ыытыллара буолуо. Дьон сирэй көрсөн олорон ыйыталларын уонна чопчу эппиэти ылалларын астыналлар. Хас биирдии ийэ анаммыт көмөнөн туһанарын туһугар маннык кэпсэтиилэр олус туһалаахтар.
Ульяна Захарова, «Саха сирэ» хаһыат, edersaas.ru
Хаартыска — СИА.