Быйыл коронавирус пандемията туран, барыбытыгар саҥаттан-саҥа тургутуулары аҕалла. Ол курдук, оскуолалар тэйиччиттэн (дистанционнай) үөрэхтээhин форматыгар киирбиттэрэ.
Кылгас кэм иhигэр учууталлар үөрэх саҥа форматын баһылаатылар. Билиҥҥи кэм учуутала элбэх сатабыллаах, тобуллаҕас толкуйдаах, түргэн буолуохтаах.
Ыам ыйыгар Тааттатааҕы үөрэх управленията куонкурус ыытта. Тэйиччиттэн үөрэхтээhиҥҥэ киирии бэйэтэ туспа уратылаах, үтүө да, мөкү да өрүттэрдээх. Кылгас кэм да буоллар, саҥа тобул, көрүү уопута үөскээтэ. Бу куонкурус икки түhүмэҕинэн ыытылынна: «Мой виртуальный урок» уонна «КарантинСкиллс». Тэйиччиттэн күрэс үгэс буолбут үөрэхтэн уратыта диэн учуутал дьүүллүүр сүбэ иннигэр турбакка, сатабылын көмпүүтэр нөҥүө көрдөрдө.
Онлайн-күрэс түмүгүн билиһиннэрэбит:
«Бастыҥ видео-уруок» номинацияҕа А.Е.Мординов аатынан лиссиэй историяҕа учуутала Анна Николаевна Сыромятникова, Игидэй оскуолатын нуучча тылыгар учуутала Мария Павловна Ермолаева, Чымнаайы оскуолатын алын кылаастарын учуутала Марина Ивановна Кондакова 1-кы, 2-с, 3-с истиэпэннээх дьупулуомунан наҕараадаланнылар. Учууталлар элбэх цифровой инструменнарга тирэнэн, методическай өттүнэн сиппит-хоппут уруоктары таҥан оҥорбуттарын хайҕыыбыт.
«Бастыҥ ZOOM-уруок» номинацияҕа гимназия нуучча тылыгар учуутала Елизавета Ивановна Неустроева, Туора Күөл математика уонна информатика учуутала Алина Степановна Харлампьева уонна биология учуутала Анна Афанасьевна Элякова 1-кы, 2-с, 3-с истиэпэннээх дьупулуомнары туттулар. ZOOM-платформаҕа үөрэтэр үгүс сыраны эрэйэр. Манна учууталлар оҕолору сөптөөхтүк аттаран дьарыктаатылар. Ол курдук, оҕолор тус санааларын аhаҕастык этэллэр, мунаарбыттарын ыйыталлар, учууталлар экраҥҥа оҕо болҕомтотун тардар интэриэһинэй презентацияларын көрдөрдүлэр.
«КарантинСкиллс» номинация хааччахтааһын кэмигэр учуутал ылыммыт цифровой сатабылларыгар олоҕуран ыытылынна. Баара-суоҕа икки ый иhигэр улуус учууталлара олус элбэҕи сатаабыттара киhини үөрдэр уонна сөхтөрөр. Бу түһүмэххэ Ытык Күөл 1-кы нүөмэрдээх оскуолатын физикаҕа учуутала Наталья Яковлевна Винокурова, Чөркөөхтөн Анна Алексеевна Никитина, Туора Күөлтэн Мария Семеновна Элякова бэйэлэрин уопуттарын «облачнай технологияларга» хайдах баhылаабыттарын бэрт сэргэхтик билиһиннэрдилэр.
«Время открытий» номинацияҕа кыттааччы тус кыаҕын төһө сайыннарбытын, элбэххэ үөрэммитин бэлиэтээтилэр. Чөркөөхтөн муусука учуутала Анна Филипповна Решетникова, Тыараhаттан информатика учуутала Полина Алексеевна Собакина уонна Туора Күөл историяҕа учуутала Артем Федорович Кладкин билиҥҥи үөрэхтээhин ирдэбилигэр сөп түбэhэр «смешанное обучение» технологиятыгар олоҕурбут үтүө саҕалааhыннарын көрдөрдүлэр.
Улуустааҕы үөрэх салалтатын начаалынньыга А.Н. Миронова, биология наукатын доктора М.М. Черосов, педагогическай наука хандьыдаата Я.И.Попова, социология наукаларын хандьыдаата А.Е.Местникова, «БИГЭ» методическэй холбоhуктан О.М.Слепцова, О.В.Корякина дьүүллүүр сүбэҕэ олордулар. Кинилэр учууталлар таhымнара үрдүгүн, онлайн-үөрэхтээhин суолун тобулбуттарын уонна сөпкө тайаммыттарын бэлиэтииллэр.
edersaas.ru саайтка анаан
Тааттаттан Ольга Корякина.