Нам улууһун Таастаах ситэтэ суох оскуолатын кэлэктиибэ Соҕуруу Кореяҕа кыһыҥҥы Олимпиада аһыллыытыгар Арассыыйа спортсменнарын өйүүллэрин биллэрэн, анал ааксыйаны ыыттылар.
Олунньу 9 күнүгэр спорт бэтэрээнэ Родион Никитин көҕүлээһининэн тэриллибит ааксыйаҕа 3-8 кылаастар үөрэнээччилэрэ уонна учууталлар, ол иһигэр физкультура учуутала Ф.Г.Атастырова, оҕо хамсааһынын салайааччы Е.П.Егорова, история учуутала И.И.Габышев, нуучча тылын учуутала М.Е.Жиркова кытыннылар.
Ф.Г.Атастырова Олимпиада историятын, күрэхтэр көрүҥнэрин оҕолорго сиһилии билиһиннэрдэ.
Тэрийээччилэр маннык ааксыйаны үөрэнээччилэри патриотическай тыыҥҥа иитэр уонна Арассыыйа спортсменнарын өйүүр соруктаах ыыппыттарын туһунан астына кэпсээтилэр. Олимпиада сабыллар күнүгэр түмүктүүр спортивнай дьаһаллары ыытар былааннаахтар. Онуоха диэри үөрэнээччилэр спорт араас көрүҥүнэн дьарыктанан, Олимпиада кыттааччыларын кытары өйдүүн-санаалыын бииргэлэрин, кинилэргэ эрэнэллэрин биллэриэхтэрэ.
Манна даҕатан эттэххэ, быйыл Таастаахха “Ийэ тыл. Өбүгэ үгэһин утума” диэн девизтээх сыл биллэрилиннэ.
Надежда ЕГОРОВА, “Саха сирэ” хаһыат, edersaas.ru