Өрөспүүбүлүкэ күнүгэр Нам улууһун мас тардыһыыга федерациятын (салайааччы Е.Е.Гоголев), спорт уонна физическай култуура кэмитиэтин (салайааччы П.Г.Иванов), Таастаах нэһилиэгин дьаһалтатын (баһылык Е.П.Лиханов) тэрийиилэринэн, Таастаахха мас тардыһыытыгар улуустааҕы аһаҕас күрэхтэһии ыытылынна.
edersaas.ru
Улуус аҕыс нэһилиэгиттэн уонна Намнааҕы педкэллиэһиттэн барыта 31 мадьыны, ол иһигэр аан дойдутааҕы турнир чөмпөйүөнэ Анатолий Гладков, бэтэрээн-мадьыны, маастарга кандидат Станислав Соловьев, кэлэннэр тыҥааһыннаах киирсиини бэлэхтээтилэр. Ити эрээри, көрөөччү аҕыйаҕа улууска бу көрүҥ күүскэ сайда илигин кэрэһилиир курдук. Спортсменнар да бэлиэтииллэринэн, билиҥҥи эдэр дьон мас тардыһыытыгар дьаныһан дьарыктаммат эбиттэр. Буулаҕа бухатыырдар, быыппастар быччыҥнар, дьиҥинэн, тыа сиригэр син көстүөхтэрэ эбитэ буолуо да, эдэр дьон наһаа олоро үөрэммиттэр эбэтэр төрөппүттэр оҕолоро спорт бу ыарахан көрүҥэр дьарыктаныахтарын баҕарбат быһыылаахтар диэн түмүккэ киһи кэлэр. Өрөспүүбүлүкэ үһүс категориялаах судьуйата Леонид Чупров сиэрдээх судьуйалааһынын түмүгэр, күрэхтэһии устата биир да мөккүөр тахсыбата, эчэйии да суох буолла.
Тоҕус көрүҥҥэ тыҥааһыннаах киирсии маннык түмүктэннэ: дьахталларга Таастаах кыргыттара кыайдылар. 60 киилэттэн үөһэ: Кривошапкина Настя бастаата, Иванова Саргы иккис, Васильева Анисия үһүс миэстэни ыллылар; 60 киилэҕэ диэри Баишева Евгения бастаата, Федотова Розалия иккис, Оконешникова Лена үһүс буоллулар.
Эр дьоҥҥо 90 киилэттэн үөһэ: Гладков Анатолий (Нам), 90 киилэҕэ диэри Ядреев Руслан (Үөдэй), 80 киилэҕэ диэри Корякин Владислав (Нам), 70 киилэҕэ диэри Габышев Владсар (Үөдэй), 60 киилэҕэ диэри Данилов Станислав (НПК), бэтэрээннэргэ 75 киилэҕэ диэри Яковлев Александр (Үөдэй), 65 киилэҕэ диэри Петров Гаврил (Модут) чөмпөйүөннээтилэр.
Кыайбыттарга итиэннэ миэстэлэспиттэргэ мэтээллэр, сыаналаах бэлэхтэр, ситиһиилэрин туоһулуур “Добун суруктар” туттарылыннылар. Күрэхтэһии муҥутуур кыайыылааҕын быһаарыыга аҕыс эр бэрдэ күөн көрсүбүтүттэн, Үөдэй мадьыныта Руслан Ядреев хотто!
Кэлбит ыалдьыттар, мадьынылар күрэхтэһии тэрээһинэ үчүгэйин бэлиэтээтилэр, маннык көрсүһүүнү сыл аайы Таастаахха ыытарга быһаардылар. Онон Нам улууһугар спорт биир ыарахан көрүҥүн, мас тардыһыытын, сайдыыта Таастаах нэһилиэгиттэн саҕылынна диэн этэр сиэрдээх.
Бу күн биир ураты түгэнинэн Ил Дархан Айсен Николаев Таастаах нэһилиэгэр былаах уонна гиэрбэ бигэргэммитин туһунан туоһу суругу, Арассыыйа Федерациятын судаарыстыбаннай геральдическай сэбиэтин бэрэссэдээтэлэ Г.В.Вилинбахов муус устар 23 күнүгэр илии баттаабыт Сибидиэтэлистибэтин нэһилиэк баһылыгар Егор Лихановка туттарбыта буолла.
Туйаара АРГУНОВА, «Саха сирэ» хаһыат, edersaas.ru саайтка анаан