Бэҕэһээ Нам улууһун Таастааҕар тутулла турар “Саха сүөһүтүн сайыннарар киин” үлэтин хаамыытын билсэ Ил Түмэн бэрэссэдээтэлэ Алексей Еремеев салайааччылаах улахан бөлөх тахса сырытта.
Нам улууһун баһылыга Юрий Слепцов уонна улуус баһылыгын тыа хаһаайыстыбатын салаатыгар солбуйааччы Филипп Николаев, Таастаах нэһилиэгин баһылыга Егор Лиханов арыаллаан илдьэ сырыттылар.
Оробуочай бөлөххө СӨ правительствотын бэрэссэдээтэлин солбуйааччыта Михаил
Никифоров, СӨ тыатын хаһаайыстыбатын миниистирэ Александр Атласов, Ил Түмэн сис комитеттарын бэрэссэдээтэллэрэ Юрий Николаев, Владимир Прокопьев, Андрей Находкин, Михаил Гуляев,
СӨ ветеринариятын департаменын салайааччыта Петр Петров, племобъединение салайааччыта Алексей Жирков, “Саха сүөһүтэ” тэрилтэ салайааччыта Александр Артемьев уо.д.а. кыттыыны ыллылар.
Бастаан «Тураҥнаах» сайылыкка тутулла турар эбийиэктэри көрдүлэр. Сайылыкка бэртээхэй саха балаҕана, сайыҥҥы ыанньык тутуллан бүппүттэр.
Салгыы чинчийэр үлэни ыытарга анааллаах научнай стационар тутулла турарын көрдүлэр. Ирдэбил быһыытынан, тутуу нэһилиэктэн тэйиччи туруохтаах. Манна 50 миэстэлээх сахалыы хотон, 2 кыбартыыралаах дьиэ тутуллан бүтэн эрэллэр. Былаан быһыытынан дьиэ аҥаарыгар – үлэһиттэр, атыныгар учуонайдар олорон, чинчийиини ыытыахтаахтар. Маны сэргэ баанньык, массыына турар гараһа тутуллуохтара. «Саха ынаҕа» тэрилтэ дириэктэрэ Александр Артемьев үлэ хаамыытын уонна инники былааннар тустарынан кылгас иһитиннэрии оҥордо.
Салгыы былырыын, сэтинньи ыйга, үлэҕэ киирбит хотоҥҥо сылдьан үлэни-хамнаһы билистилэр, көрдүлэр.
Маны таһынан Таастаахха саха ынаҕар анаммыт 80 миэстэлээх иккис хотон үлэҕэ киирдэ.
Үлэлиир бөлөх саҥа хотон арыллыытын үөрүүлээх тэрээһинигэр кыттыыны ылла. Ыалдьыттар тэрээһин кыттыылаахтарын бэлиэ күнүнэн уонна кэлэн иһэр Саҥа дьылынан эҕэрдэлээн туран, саха сүөһүтүн иитэ-көрө сылдьар үлэһиттэргэ, Александр Артемьев салайааччылаах “Саха сүөһүтэ” генафонда тэрилтэҕэ махтал тылларын эттилэр.
Нам улууһун дьаһалтатын пресс-сулууспата