Мииринэй Таас Үрэх нэһилиэгин 9 нүөмэрдээх оскуолатын олбуоругар сабыс-саҥа стадион арылынна. Бу стадиону тутуу Роснефть хампаанньа иһинэн үлэлиир «Таас-Юрях Нефтегазодобыча» үбүлээһининэн олоххо киирдэ.
edersaas.ru
Бу успуорт эбийиэгэр аһаҕас халлаан анныгар чэпчэки атлетиканан, баскетболунан, волейболунан уо.д.а. успуорт көрүҥүнэн дьарыктаныахха сөп. Стадион туох баар аныгы ирдэбилгэ толору эппиэттиир гына бырайыактаммыт.
«Төрөөбүт нэһилиэкпит 125 сааһыгар бу стадион бастыҥ бэлэх буолла! Биһиги Таас Үрэх олохтоохторо бэйэбит стадионнаах буолуохпутун баҕарбыппыт ыраатта. Нэһилиэккэ успуордунан дьарыктанар дьон ахсаана биллэ элбиэҕэ диэн эрэнэбит. Ким эмэ успуорка бастакы хардыытын, бастакы кыайыы үөрүүтүн манна билиэ турдаҕа” – диэн оскуола дириэктэрэ Эмилия Симонова үөрүүтүн үллэһиннэ.
«Таас-Юрях Нефтегазодобыча» хампаанньа Мииринэй оройуонугар үлэлиэҕиттэн, Таас Үрэх нэһилиэгин олоҕор-дьаһаҕар өрүү күүс-көмө буолар. Муниципалитет амбулаториятын материальнай техническэй баазатын тупсарыыга, оскуола дьиэтин өрөмүөннүүргэ үлэлэспитэ хайҕаллаах. Итиэннэ хампаанньа суһал көмө массыынатын атыылаһан биэрбит.
Ирина Ханды, “Саха сирэ” хаһыат, edersaas.ru
Хаартыска: СИА