Кини оҕо эрдэҕинэ икки эбээтэ туос иһити тигэллэрин көрө—көрө, эмиэ араас оҥоһугу оҥоруон, тигиэн наһаа баҕарара үһү.
edersaas.ru
Мииринэй улууһун Таас Үрэх нэһилиэгин олохтооҕо Ульяна Попова ол иитиэхтии сылдьар толкуйа туолбакка, ыра санаа курдук дууһатыгар иҥэн сылдьыбыт.
Онтон Чурапчыга Олоҥхо Ыһыаҕар тиийбит. Онно уус-уран оҥоһуктар быыстапкаларын көрө сылдьан, Семен Черноградскай туос оҥоһуктарыгар хараҕа хатаммыт. Маастар кини үлэлэрин олус болҕомтолооохтук одуулуу турар Ульянаттан:
— Эн маннык тууйастары тигиэххин баҕараҕын быһыылаах? – диэн интэриэһиргээбит. ОнуохаУльяна Николаевна: «Үөрэтиэҥ дуо?» – диэн ыйыппыт.
— Ити курдук, Чурапчы ыһыаҕын кэнниттэн тута, Семен Черноградскайы кытта Нөмүгүлүүр буолан хаалбытым. Семен Степановичка тиийэн, туоһу тигиигэ ымпыгар—чымпыгар тиийэ үөрэммитим.
2015 сыллаахха бочуоттаах сынньалаҥҥа тахсан баран, солотуйбучча туос тигиэхпин баҕаран кэлбитим. Биир ыаҕайаны тигэн көрбүтүм. Били, кыра сылдьан эбээлэрим тигэллэрин көрөн да буолуо, Семен Черноградскайга үөрэммитим да таайдаҕа, иис ньыматын уруккуттан билэрдии, улам ылларан барбытым», — диэн кэпсиир Ульяна Попова.
Олоҥхо Ыһыаҕар – уопут атастаһа
Айар куттаах киһи аны сыл аайы ыытыллар Олоҥхо Ыһыахтарын көтүппэккэ сылдьарга санаммыта. Бастакынан, уопут атастаһыыта. Ону-маны оҥорор, уһанар, тигэр киһи атын дьон үлэтин бэйэтинэн көрдөҕүнэ-иһиттэҕинэ эрэ сатанар, элбэххэ үөрэнэр. Иккиһинэн, үлэтин көрдөрөн, улууһун аатыттан кыттан, туһугар, төрөөбүт Мииринэйин чиэһин көмүскээһин.
— Оройуоҥҥун сирэйдиир эппиэтинэскин, атын улуустары кытта тэҥҥэ быыстапкаларга туран билэҕин. Онно хас биирдии маастар тус бэйэтэ буолбакка, бастатан туран, улууһа ааттанар. Онтон дьэ, дьүүллүүр сүбэ эн үлэҕин сиһилии үөрэтэр. Аан бастаан миигин нэһилиэгим баһылыга Зоя Данилова Бүлүүгэ ыытыллыбыт Олоҥхо ыһыаҕар бэйэтин көлөтүгэр олордон, бэрэстэбиитэл быһыытынан илдьэ сылдьыбыта. Онтон Алдан куоракка, Нам улууһугар ыытыллыбыт Олоҥхо ыһыахтарыгар сылдьыбытым. Быйыл саас өрөспүүбүлүкэтээҕи «Якутия мастеровая» быыстапкаҕа кыттан кэлбитим. Бу быыстапкаларга кыттыым түмүгэр, миигин «Уус уран оҥоһук маастара» бочуоттаах аакка түһэрбиттэрэ. Ол докумуону ыла бараары сырыттахпына, коронавирус сыстыганнаах дьаҥа туран мэһэйдээн кэбистэ, — диэн кэпсиир Ульяна Николаевна.
Туос хастаары – мотуордаах оҥочонон
Ульяна Попова бэлиэтииринэн, туос иһити, киэргэли тигии олус үлэлээх.
— Ол курдук, маллаах иһиттэри тигэрбэр туоспун эрдэттэн хастаан бэлэмниибин. Биһиги, туос хастаары, хатыҥнаах сиргэ мотуордаах оҥочонон ыраах айанныыбыт. Иһиппин курдуурбар талах быһабын. Сапка сылгы сиэлиттэн уонна кутуругуттан ситии хатабын. Онтон ыйы быһа тигэбин. Ыаҕайа тигиитэ – судургу. Ону үс күнүнэн бүтэрэбин. Туос иһиттэн хаалбыт ордуктартан харысхал оҥоробун», — диэн кэпсиир сэһэргэһээччим.
Бэс ыйыгар үлэ саамай үгэнэ. Ульяна сылы быһа 4-5 маллаах иһити тигэргэ суоттанар. Онон онно сөптөөх туоһу хастыыр кэмэ үүннэ.
«Иис» куруһуок салайааччыта
Ульяна нэһилиэгин кулуубун иһинэн үлэлиир «Иис» куруһуогу салайар. Онно уонча дьахтары мунньан, туос иһити тигэргэ үөрэтэр. Ону тэҥэ, куруһуокка кылынан сэлээппэ баайаллар, дэйбиир оҥороллор. Кэрэхсэбиллээҕэ баар, маастарга оҕолор эмиэ баҕаран туран анаан үөрэнэллэр.
«Били, урут бэйэм туос киэргэли оҥорон, иһити тигэн таһаарыахпын баҕарарбын санаан, холонуон баҕалаах дьоҥҥо барыларыгар сүбэ-ама буолабын, иискэ угуйабын», — диэн санаатын үллэстэр мин уран тарбахтаах дьоруойум.
Ити курдук, Мииринэй улууһун Таас Үрэх олохтооҕо Ульяна Попова курдук айар куттаах дьон бэйэлэрин тула сырдыгы, кэрэни, үйэлээҕи саҕаллар.
Елена ПОТОЦКАЯ, «Саха сирэ» хаһыат, edersaas.ru