Бу күннэргэ Өймөкөөн улууһун 100 сылынан сибээстээн, улуус нэһилиэктэрэ, бөһүөлэктэрэ тупсарынан, ыраастанан, суолталаах үбүлүөйү тэрээһиннээхтик бэлиэтииргэ бэлэмнэнэллэр.
edersaas.ru
Сыстыганнаах дьаҥынан бары үбүлүөйдээх тэрээһиннэр сыл иккис аҥаарыгар көһөрүлүннүлэр. Онон сайыҥҥы кэмнэри баттаһа, өрөмүөннэнэргэ, сонун сүүрээннэри олоххо киллэрэргэ бириэмэ баар курдук.
Оройуон киинин Уус-Ньара баһылыга Александр Роданич бэлиэтииринэн, сотору кэминэн улуус киинин алта дьиэтин көстүүлээх эркиннэрин соҕуруу куорат курдук уруһуйунунан киэргэтиэхтэрэ.
— Уруһуй тиэмэтэ — Өймөкөөн улууһун аатырдыбыт, бренд оҥорбут бэлиэлэрэ. Онон ыалдьыттыы кэлбит дьон да, олохтоохтор да, Уус-Ньара киин уулуссаларынан ааһан иһэн харахтарын сымнатыахтара, — диэн Александр Евгеньевич санаатын үллэстэр.
Ол курдук, Тымныы хаһаайына Чысхаан Уус-Ньара киинин — Ленин уулуссатын биир көстүүлээх дьиэтин киэргэтиэҕэ.
Ол аттынааҕы дьиэҕэ (эмиэ Ленин уулуссата) Өймөкөөн сылгыта уруһуйданан дьон болҕомтотун тардыаҕа.
Киин Коммустическай уулуссаҕа — таба уруһуйданан, эмиэ Өймөкөөнү сирэйдиэҕэ.
Тымныы полюһа былыр сэлии дойдута буоларын эмиэ Ленин уулуссатын киэргэтэр ойууттан билиэхпит.
Тыатааҕы оҕолорун кытта ойуута Өймөкөөн тыаларыгар үгүһүн бигэргэтиэҕэ.
Уус-Ньаратааҕы Оҕо дьиэтэ оҕо саас сылаас уйата буоларын бу уруһуйтан билиэхпит.
… Ити курдук, Өймөкөөн улууһун 100 сыллаах үбүлүөйүгэр сонун сүүрээннэри олоххо киллэриэхтэрэ.
Елена ПОТОЦКАЯ, «Саха сирэ» хаһыат, edersaas.ru