Софрон Петрович Аксаков 1908 сыллаахха Үөһээ Бүлүү Оҥхой нэhилиэгэр күн сирин көрбүтэ. 1942 сыллаахха Үөhээ Бүлүү оройуонугар Буденнай аатынан холкуос бырабылыанньатын бэрэссэдээтэлинэн үлэлии сылдьан от ыйыгар аармыйаҕа ыҥырыллыбыта. 1942 сыл балаҕан ыйыттан Сталинградскай, Волховскай, 2 Прибалтийскай, Ленинградскай фроннарга сэриилэспитэ.
Сталинград куораты көмүскүүр сэриигэ 1942 сыллаахха 64-с стрелковай полкаҕа сэриилэспитэ. 9-сс рота политруга окуопа таһыгар бааhыран охтубутун быыhaабыта. Бойобуой үтүөлэрин иhин мэтээлинэн наҕараадаламмыта. Бааhыран госпиталларга эмтэнэн баран, 1945 сылга диэри 8-с байыаннай суол управлениетыгар сулууспалаабыта.
— Кини үтүө аатын биhиги таайбыт өрөспүүбүлүкэ үтүөлээх учуутала Аксаков Анатолий Софронович уонна биhиги сиэннэр үйэтитэ сылдьабыт. Таайбыт Анатолий Софронович аҕатын тутта сылдьыбыт малларын, наҕараадаларын, суруктарын харыстаан мунньа сылдьар, элбэх ахтыы суруйан хас да кинигэ таhааттарда, — диэн сиэнэ Анастасия Петровна Ноева кэпсиир.
edersaas.ru