Сунтаар улууһа уопсайа 5 780 408 гектар сирдээх. 23 тыһыынчаттан тахса нэһилиэнньэлээх, өрөспүүбүлүкэ биир улахан улуустарыгар киирэр. Быйылгы кыстыкка 15 тыһыынча кэриҥэ сүөһү кыстаан турар.
Анивера Акимова, «Саха сирэ» хаһыат, https://edersaas.ru
Онон тыа хаһаайыстыбатынан дьарыктанар улуустар ахсааннарыгар киирэр. Ааспыт үйэ көрдөрүүлэринээҕэр сүөһү ахсаана төһө да аҕыйах буоллар, ордук саастаах дьон сайыннары оттоон, сүөһүлэрин,сылгыларын тутан олороллор. Уһун Күөл олохтооҕо Мария Неустроева СӨ толорор былааһын отчуотун кэмигэр, балбааҕы тиэйии боппуруоһун көтөхтө.
«Бастаан утаа, нолуок туһунан ыйытыа этим. Тоҕо наһаа элбэх нолуогу төлүүбүт? Бэйэлээх бэйэм бас билиибэр кытта нолуок харчытын ылаллар. Иккиһинэн, «тааҥкабытын» ханна гынабыт? Былырыын балбааҕы тиэйиигэ 60 тыһ. солк. көрбүттэрэ. Быйыл 30 тыһ. солк. эрэ. Ол аата биир тааҥка тиэйиитигэр 100 солк. тиксэр. Онон тиэйии-таһыы боппуруоһа кытаатта. Ким да ылсыан баҕарбат»,- диэн бырабыыталыстыба бэрэссэдээтэлин бастакы солбуйааччыга Петр Алексеевка эттэ.
Дьиҥэр, балбааҕы тиэйии боппуруоһун бырабыыталыстыба буолбакка, олохтоох дьаһалта быһаарыахтаах этэ. «Тааҥка» тиэйиитин бэйэҕит искитигэр быһаараарыҥ. Атын сиргэ балбаах сыаналаах ээ»,- диэн Петр Николаевич хардарда.
Уһун Күөл олохтоох сэбиэтин дьокутаата Николай Егоров ходуһалары күрүөлээһини туруорсуу бэрээдэгинэн ыйытта. Онуоха быйыл ходуһалары күрүөлээһин бырагыраамата салгыы ыытыллыахтааҕын уонна Сунтаар улууһугар үп-харчы көрүллүөхтээҕин иһитиннэрдилэр.
Анивера Акимова, «Саха сирэ» хаһыат, https://edersaas.ru