Сунтаар улууһун Күүкэйигэр 11 саастаах Ярик Попов пластилинтан байыаннай тиэхиньикэлэри оҥорон бэйэтин ютуб ханаалыгар коллекциятын хаҥатар. Бүгүн социальнай ситим нөҥүө кинилиин кэпсэттим.
edersaas.ru
— Ярик, дорообо! Пластилин оҥоһуктаргынан ханнык эмит быыстапкаҕа кыттыбытыҥ дуо?
— Оскуолам иһинэн кэмпириэнсийэҕэ кыттан үһүс миэстэ буолбутум. Оттон тааҥкалары, байыаннай хараабыллары кумааҕыга уруһуйдаммыттан үтүктэн оҥоробун. Маннык оҥоһуктары оҥорорбун ийэм өйүүр. Кини миэхэ анал скульптурнай пластилин атыылаһар.
— Ярик, саамай сөбүлээн оҥорбут тааҥкаҥ ханныгый?
— Тааҥкаларбын барыларын сөбүлүүбүн. Т — 34-85, СУ — 152, ИС -7 онтон да атын тиэхиньикэ элбэх. Мин тиэхиньикэлэрим ис мотуордарын эҥин таҥан оҥоробун, ол иһин наһаа үлэлээх уонна умсугутуулаах. Төһө баҕарар өр олорон оҥоруохпун сөп.
— Инникитин туох былааннааххын уонна улааттаххына ким буолуоххун баҕараҕын?
— Бэйэм ютуб ханааллаахпын. Аата » Мир моих техник» диэн. Онтум коллекциятын элбэтиэхпин баҕарабын. Улааттахпына тутааччы идэтин баһылыам этэ.
Ульяна Захарова, edersaas.ru