Бэҕэһээ, ыам ыйын 9 күнүгэр, Улуу Кыайыы күнүн бары сүһүөхпүтүгэр туран көрүстүбүт. Бэҕэһээ дьон бу ураты күнү ахтыбыттыы бары кэриэтэ тахсан, сэлэлии хаамтылар, уруй-айхал тылларын эттилэр.
Бүлүү улууһун биир үтүөкэннээх нэһилиэгэр Тааһаҕарга эмиэ бу ураты күнү үрдүк таһымнаахтык ыллылар. Төһө да халлаан киһини супту үрэр сытыы тыаллааҕын-куустааҕын үрдүнэн нэһилиэк дьоно бары үөрэн-көтөн тахсан, Улуу Кыайыы күнүн уруйдаатылар, уоттаах сэриигэ кыттыбыт бэтэрээннэрин ахтан-санаан аастылар.
Нэһилиэк дьаһалтата төрөөбүт дойдулара сайдарын туһугар өр сылларга үтүө суобастаахтык үлэлээбит ытык-мааны кырдьаҕастарын ыҥыран эҕэрдэлээтэ. Ытык-мааны кырдьаҕастар элбэх астаах-үөллээх остуол тула олорон, ол уоттаах сэриигэ сылдьыбыт биир дойдулаахтарын, сопхуос кэминээҕи үлэ-хамнас туһунан кэпсэтэн, эдэр эрдэҕинээҕилэрин санаан-ахтан аастылар.
Тааһаҕар нэһилиэгин олохтооҕо Полина Михайловна Харлампьева: “Икки сыл коронавирус дьаҥыттан сылтаан, Улуу Кыайыы күнүн дьиэбитигэр ыларга күһэллибиппит. Быйыл ыарыы намыраан, бары кэриэтэ тахсан, сэлэлии хааман, Улуу Кыайыы күнүн айхаллаатыбыт-уруйдаатыбыт. Бырааһынньыктааҕы миитин кэнниттэн соторутааҕыта киирбит саҥа оскуоланы көрдүбүт-иһиттибит. Биир бэйэм аан бастаан көрдүм. Килэйэн-халыйан дьиэ-уот, уурбут-туппут курдук оҥоһуулаах, ып-ыраас, сып-сырдык. Кыргыттарга аналлаах кылааска иистэнэр массыыналар, уолаттарга аналлаах кылааска уһанарга аналлаах станоктар бөҕө кэчигирээбиттэр. Сэлэлии хаамыыга нэһилиэнньэ үгүс өттө сырытта. Этэргэ дылы, үтүөкэннээх бырааһынньыкпытын бары даҕаны ахтыбыт эбиппит. Нэһилиэкпит салалтата кырдьаҕастары анаан-минээн массыынанан ылбыта. Уопсай тэрээһин кэнниттэн балаҕан дьиэҕэ мааны остуол тэрийэн, чэйдэттилэр, уруккуну-хойуккуну кэпсэтэн дуоһуйа астынныбыт. Түгэнинэн туһанан, баһылыкпыт Сэмэн Каратаевка, дьаһалта бары исписэлиистэригэр ис-сүрэхпиттэн махтанабын! Кэлиҥҥи кэмҥэ нэһилиэкпит олус сайынна, ол курдук, икки мэндиэмэннээх таас оскуола, саҥа ФАП тутуллан дьэндэйдилэр. Аны билигин култуура дьиэтэ тутулла турар. Быйыл сэтинньи диэки үлэҕэ киирэр диэн баһылыкпыт иһитиннэрэн үөртэ”, — диэн санаатын үллэһиннэ.
Санатар буоллахха, бэҕэһээ Бүлүү куоракка ыытыллыбыт Улуу Кыайыы 77 сылынан уопсастыбаннас үөрүүлээх мунньаҕар улуус социальнай-экономическай сайдыытыгар таһаарыылаах үлэлэрин иһин Тааһаҕар нэһилиэгин баһылыгынан эҥкилэ суох өр сылларга үлэлээбит Афанасий Поскачиҥҥа, нэһилиэк билиҥҥи баһылыга Семен Каратаевка «100 лет Якутской АССР» үбүлүөйүнэй бэлиэни үөрүүлээх быһыыга-майгыга улуус баһылыга Сергей Винокуров туттарбыта.