Саха сиригэр бэйэни хааччахтанан олоруу эрэсиимиттэн сыыйа тахсыы суолларын тобулаллар. Биир оннук бастакы ньыманан соҕотох киһи таһырдьа тахсан физкултууранан, спордунан дьарыктанара буолар. Биллэн турар, харыстанар ньымалары тутуһан туран. Ол гынан баран, спортивнай саалалар, фитнес-кулууптар үлэлээбэттэр.
edersaas.ru
Өрөспүүбүлүкэтээҕи суһал ыстаап бэрэссэдээтэлэ Ольга Балабкина иһитиннэрбитинэн, билигин бэйэни хааччахтаныы эрэсиимин сыыйа сымнатарга нэһилэнньэлээх пууннары 4 бөлөххө араардылар.
Ол курдук, толору харантыын биллэриллибит сирдэригэр: Сунтаар Кутанатын аттынааҕы баахта бөһүөлэгэр, Ленскэй оройуонун Чайыҥдатааҕы баахта бөһүөлэгэр, Алдан оройуонун Ленинскэй бөһүөлэгэр кэлии-барыы, ханнык да сымнатыы миэрэлэрэ бобуллаллар. Ол эрээри, бүгүҥҥүттэн Алдан оройуонугар харантыын тохтоото.
Иккиһинэн, бэйэни хааччахтаныы толору эрэсиимэ Дьокуускайга, Жатайга, Аллараа Бэстээххэ, Покровскайга, Нерюнгри, Мииринэй, Ленскэй, Алдан оройуоннарыгар ыам ыйын 31 күнүгэр диэри уһаата.
Бу нэһилиэнньэлээх пууннар олохтоохторо дьиэлэриттэн мээнэ тахсыа суохтаахтар. Киһи олоҕор, доруобуйатыгар куттал суоһаатаҕына, мэдиссиинэ көмөтүгэр наадыйдахха эрэ тахсар көҥүллэнэр. Ону тэҥэ, чугастааҕы маҕаһыыҥҥа, аптекаҕа ас, эмп атыылаһа, бөх тоҕо, дьиэ кыылларын күүлэйдэтэ тахсар көҥүллэнэр.
Ольга Балабкина эппитинэн, ыам ыйын 12 күнүттэн бу куораттарга, бөһүөлэктэргэ парикмахерскайдар, ательелар, химчисткалар, атах таҥаһын өрөмүөннүүр, таҥас сууйар, иистэнэр, о.д.а. араас өҥөнү оҥорор чааһынай тэрилтэлэр бары ирдэбили тутуһан үлэлииллэрэ көҥүллэннэ. Ону тэҥэ, биирдиилээн тахсан, спордунан дьарыктаныахха сөп.
Мантан атын улуустарга атыы-эргиэн, араас өҥөнү оҥорор тэрилтэлэр санитарнай нуорманы тутуһан үлэлиэхтэрин сөп.
Оттон төгүрүк сыл массыынанан сырыы суох, ыраах сытар 140 нэһилиэнньэлээх пууҥҥа туох баар хааччахтар бары уһулуннулар. Арай 50 киһиттэн элбэх кыттааччылаах маассабай тэрээһиннэр эрэ бобуллаллар. Ону тэҥэ, санитарнай ирдэбиллэр тутуһуллаллара уонна профилактика үлэтэ ыытыллара булгуччулаах.
Ангелина Васильева, “Саха сирэ” хаһыат, edersaas.ru
Хаартыска: exo-ykt.ru