Быраас уонна тэлэбиисэринэн биэриини ыытааччы Евгений Комаровскай инстаграмыгар коронавируһу утары хайдах дьаһаныахха сөбүн туһунан дьон ыйытыытыгар хоруйдаата.
«Таһырдьаттан киирэн баран таҥаспытын дезинфекциялыыбыт дуо?» диэн үгүс киһи ыйытар. Комаровскай этэринэн, өскөтүн эн таскар ким эрэ ытырдыбыт, сөтөллүбүт буоллаҕына уонна лифт эркинигэр өйөннөххүнэ, кирилиэс, аан тутааҕын туттаххына, таҥаскын тута ыраастыаххын наада.
Оттон оннук түгэн суох буоллаҕына, аһары долгуйар оруна суох. «Таһырдьа тахсарга хас да таҥастаах буолуҥ, кэллигит да ону устан, болкуоҥҥа икки-үс күҥҥэ ыйааҥ, күн вируһу өлөрөр», — диир быраас.
Кини этэринэн, коронавирус мааскаҕа, эбэтэр бэрчээккэҕэ «олорсон» дьиэҕэ кэллэҕинэ, кирдээх илиигинэн хараххын ньухханнаххына, муннугун, сирэйгин тыыттаххына биирдэ сыстыан сөп.
Таҥаһы 50’С итэҕэһэ суох итии ууга сууйуҥ, хлордаах маҥхатар сириэстибэни туттуҥ диэн сүбэлииллэр. Бачыыҥкаҕытын испиирдээх, эбэтэр атын дезинфекциялыыр убаҕаһынан сотуҥ.
Хаартыска rbk.ua
Марианна Тыртыкова, «Саха сирэ» хаһыат, edersaas.ru