Сайыммыт чугаһаан, хаһаайыстыбалар сайылыктарга тахсарга бэлэмнэнэн эрэллэр. Сотору кэминэн күөх от бытыгыраан, үрүҥ илгэ дэлэйиэҕэ, үүт ас элбиэҕэ. Чахчыта, сүөһүлэр күөх дуолга көҥүл мэччийэр буоланнар, кылгас сайын эрэ устата элбэх үүт ыаныллар.
Быйыл өрөспүүбүлүкэ үрдүнэн 62 тыһыынча туонна үүт ыанарыгар былаан баар. Тыа хаһаайыстыбатын министиэристибэтин дааннайынан, билиҥҥи туругунан, 8,2 тыһыынча туонна үүт ыанна, ол эбэтэр, сыллааҕы былаан 13,3 %-на буолар.
Тыа хаһаайыстыбатыгар оҥорон таһаарааччыларга үүтү ыаһыҥҥа субсидия көрүллэр. Субсидияны учуоттаан, үүт биир киилэтин алын сыаната 60 солкуобайга тэҥнэһэр.
Бүгүҥҥү күҥҥэ бу субсидиялааһын үбүлээһинигэр 1,5 миллиард солкуобай көрүллэн турар. Бу 2022 сылга көрүллүбүт үп 49,7%-на буолар. Быйыл 20 улууска уонна Дьокуускай куоракка үүтү тутар, оҥорон таһаарар 36 тэрилтэ бигэргэннэ, ол иһигэр Сунтаарга, Хаҥаласка – түөртүү тэрилтэ баар.
Оҥорон таһаарар тэрилтэлэргэ кэтэх хаһаайыстыбалаах дьонтон үүтү туталларыгар судаарыстыбаннай көмө кээмэйэ 58 мөлүйүөн солкуобайга тэҥнэһэр. Ил Дархан Айсен Николаев сорудаҕынан, эбии 114 мөлүйүөн солкуобай көмө быһыытынан ыытыллара былааннанар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.