Бэҕэһээ СӨ тыатын хаһаайыстыбатын миниистирэ Александр Атласов үүт сыаната сотору үрдүөҕэ диэн эппитин тыа сирин олохтоохторо, ордук тэрээһиннээх хаһаайыстыбалар салайааччылара, үлэһиттэрэ олус үөрэ истибиттэр.
Сөптөөх дьаһал
Елена Тутукарова, “Күүлэт” кээпэрэтиип салайааччыта, Бүлүү улууһа:
— Сыана араас хайыскаҕа барытыгар үрдээтэ. Онон сибээстээн биһиги Ил Дархаммыт Айсен Николаев үүт соҕотуопкатын сыанатын үрдэтэр туһунан сорук туруорбута олус кэрэхсэбиллээх. Дьону хамнастаан, нолуок төлөөн үлэлиир хаһаайыстыбалар ороскуоттара олус элбэх. Билиҥҥи балаһыанньаҕа оҥорон таһаарар аспытын элбэттэхпитинэ, атыттартан тутулуктаммакка бэйэбит хааччынар толору кыахтаахпыт. Ол наадатыгар, тыйыс усулуобуйаҕа олорорбутунан ороскуоппут элбэҕинэн сибээстээн, тыа хаһаайыстыбата сөптөөх көмөнү хайаан да ылыахтаах. Иккиһинэн, үбүлээһин быһаччы оҥорон таһаарааччыга тиийэрэ буоллар, быдан көдьүүстээх буолуох этэ.
Үөрэ иһиттибит
Саргылаана Десяткина, “Тумул” кээпэрэтиип зоотехнига:
— Үүт сыаната үрдүүрүн туһунан “Эдэр саас” саайка тахсыбыт иһитиннэриини ордук тыа хаһаайыстыбатыгар үлэлии сылдьар дьон олус үөрэ, астына иһиттибит. Бары табаарга, бородууксуйаҕа сыана үрдүү турар кэмигэр, үүт субсидията үрдүүрэ саамай сөп. Сыл аайы сыана хамсааһынынан көрүллэн, үүт сыаната эмиэ онно тэҥнэниллэн иһиллиэхтээх дии саныыбын. Түгэнинэн туһанан, Ил Дархан Айсен Николаевка махталбын тиэрдэбин.
Александр Тарасов, «Саха сирэ» хаһыат