Дойдубар бара сылдьан, “Үрдэл” ТХПК бородууксуйатын сыаната чэпчэкитин сөҕө санаатым. Үүт сыаната — 50 солкуобай, суорат, кэпиир, йогурт – 30-40 солкуобай, иэдьэгэй – 50 солкуобай, арыы – 700 солкуобай. Бу маннык чэпчэки сыананы көрбүккүт дуо, доҕоттоор? Сыана үрдүү турдаҕына, өрөспүүбүлүкэ үрдүнэн үүт аска саамай чэпчэки сыана буолар диэтэххэ, сыыспаппыт.
“Үрдэл” ТХПК – бу Үлэ Дьоруойдаах “Кириэстээх” кэпэрэтиип тэрилтэтэ. Сунтаарга уонна Кириэстээххэ оҥорон таһаарар собуоттардаах, Илимнииргэ, Куокунуга, Тойбохойго, Бордоҥҥо, Кириэстээххэ, Сунтаарга маҕаһыыннардаах.
Сайыҥҥы өттүгэр бэйэтин пиэрмэлэриттэн уонна бааһынай хаһаайыстыбалартан күҥҥэ 12-13 туонна үүтү тутар. Билигин Кириэстээххэ биэс сайылыгынан үрүҥ илгэ үрүлүйэр.
“Кириэстээх” ТХПК дириэктэрэ Владимир Семенович Егоровтан үүт бородууксуйатыгар сыана тоҕо чэпчэкитин туоһуластыбыт.
— Сайыҥҥы өттүгэр бородууксуйабыт кээмэйэ элбиир. Ону тэҥэ, кыһын үүппүтүн бүддьүөт тэрилтэлэрэ (оскуолалар, уһуйааннар) ордорбокко толору ыла олорор буоллахтарына, сайын кинилэр үлэлээбэттэр, онон бородууксуйа ордон, ырыынакка тахсан биэрэр.
Иккиһинэн, нэһилиэнньэни кэлии үүттэн араарар туһуттан, сыанабытын ыам ыйын 1 күнүттэн алтынньы 1 күнүгэр диэри соруйан түһэрэбит. 100-150 солкуобайдаах бороһуок үүтү ылыахтара дуу, 50 солкуобайдаах ынах үүтүн дуу? Онон бу маҕаһыыннаах нэһилиэктэрбитигэр дьон хамаҕатык атыылаһар. Дьон-сэргэ олохтоох, сибиэһэй үрүҥ аһынан аһаатаҕына, доруобуйата көнөр буоллаҕа.
Кыһыннары да биһиги сыанабыт удамыр буолар: үүт сыаната – 80 солкуобай, суорат – 60 солкуобай. Улууска саамай чэпчэки сыаналаах бородууксуйалаахпыт, — диэн кини кэпсээтэ.
Дьэ, чахчы, ыаммытынан үүтү астыы охсон, аҕыйах чааһынан тиэйэн аҕалан, күнүнэн атыылыыллара, сибиэһэй бородууксуйа амтанныын атын. Ол да иһин маҕаһыын долбууругар сытан хаалбат, аһыйбат, 1-2 күнүнэн атыыланар. Сунтаарга өссө “Татыйыына” хампаанньа бэйэтэ пиэрмэлээх, оҥорон таһаарар собуоттаах буолан, ырыынакка күрэстэһии ньымата баар эбит.
Бэйэбит сибиэһэй, иҥэмтиэлээх үүппүт-эппит, балыкпыт, отоммут баар буола турдун, судаарыстыба көмөтүнэн оҥорон таһаарыы сайдан истин! Оччоҕо эрэ норуот доруобуйата чөл буолуоҕа. Атын да улуустарга бу холобуру батыһаллара буоллар, куһаҕана суох буолуо этэ дии саныыбын.
Ангелина Васильева, «Саха сирэ» хаһыат, edersaas.ru
Хаартыска: ааптар түһэриитэ.