– Арассыыйа бэрэсидьиэнэ Владимир Путин агростраховка ситимигэр уларытыылары киллэрэр туһунан 563 №-дээх федеральнай сокуоҥҥа илии баттаабыта АПК көмүскэлин тэрийиигэ саҥа кэрдиис кэми арыйар, – диэн Агростраховщиктар национальнай сойуустарын (АНС) бэрэсидьиэнэ Корней Биждов ааспыт сыл түмүгүн таһаарарыгар бэлиэтээбит.
Сокуоҥҥа уларытыылар Федерация Сэбиэтигэр, Судаарыстыбаннай Дуумаҕа, Тыа хаһаайыстыбатын уонна Үп министиэристибэлэригэр, Арассыыйа Бааныгар, АНС-гар итиэннэ салааларынан аграрнай сойуустарга ырытыллан, дьүүллэһиллэн баран киллэриллибиттэрэ. Ол иннинэ аквакултуураны страховкалааһыны өйөөһүн сокуона ылыллыбыта. Инньэ гынан, ааспыт 2018 сылга тыа хаһаайыстыбатын страховкалааһын эйгэтигэр икки сокуон олоххо киллэрилиннэ.
Үтүө сибикилэр хайы-сах биллэн эрэллэр: ахсынньы 1 күнүнээҕи туругунан, дойду үрдүнэн ыһыллар сир иэнин страховкалатыы 3 %-нан, сүөһүнү страховкалатыы 16 %-нан улааппыт. Маны Корней Биждов кэлиҥҥи икки сылга АПК өйөбүлүн ситимигэр киллэриллибит уларыйыылар түмүктэрин быһыытынан сыаналыыр. Бырабыыталыстыба саҥа тахсыбыт уурааҕа ыксаллаах быһыыга-майгыга толуйуу кээмэйин страховка полиһын кытары ситимнээн, тыа хаһаайыстыбатыгар агростраховка оруолугар улахан суолтаны уурбутун этэр. Халаан, уот, кураан о.д.а. содулларыгар ыксаллаах быһыы-майгы үөскээһинин сэрэтэр, туоратар дьаһал салааны сайыннарыы судаарыстыбаннай бырагырааматыгар туспа салаанан киллэриллиэхтээх диир.
Ыспыраапка
Тыа хаһаайыстыбатын страховкалааһыны судаарыстыба өттүттэн өйөөһүн ситимигэр Бүтүн Арассыыйатааҕы холбоһук — Агростраховщиктар национальнай сойуустара 2016 с тохсунньу 1 күнүгэр тэриллибитэ. Сойууска киирбэтэх страховкалыыр хампаанньалар судаарыстыбаттан өйөбүллээх агростраховка дуогабарын түһэрсэр бырааптара суох.
Раиса СИБИРЯКОВА, «Саха сирэ» хаһыат, edersaas.ru