От ыйын 13 күнүгэр Хатас нэһилиэгин олохтоохторо бииргэ буолартан бигэ буолууну, сомоҕолоһууттан күүстээх буолууну бу тутан туран биллибит, дьиҥ-чахчы көрдүбүт.
edersaas.ru
Айылҕабыт кэлиҥҥи сылларга үрүҥмүтүн- харабытын быһаарар тоһуурдары, тургутуулары бэрт чаастатык оҥорор буолла. Бүгүн сүүрүк күүһэ быһыппытын алдьатан анараа, бэтэрээ биэрэккэ араарталыы сырытта. 40 тахса массыына анараа биэрэккэ хаалла сырытта. Ким сөтүөлүү, сынньана, ким оттуур сирин көрө, от охсо уо.д.а киирэн баран, 6 чаас саҕана дьиэлэригэр кэлэр суоллара быста сырытта.
Олохтоох дьаһалта, хаһан да буоларын курдук, көмөҕө аан бастакынан Сергей Пимоновы ыҥырбыт. Сергей Сергеевич туох да тоҕото, токкоолоһуута суох кэлэн үлэлээн баран, кыайтарбат эбит диэн өссө күүс наада диэбитигэр, »Прогресс»-тары уонна Александр Павловы көрдөспүттэр. Ыксаллаах балаһыанньаҕа биир биэс тыла суох, «биир киһи туһугар бары», «бары биир киһи туһугар» диэн мээнэ этиллибитэҕин туоһута буолан, сүҥкэн улахан кыахтаах тиэхиньикэ кэлэн, 5 чаас устата биирдэ да тохтообокко үлэлээн биэрэги холбоотулар!
Дьэ, бу буоллаҕа дии – дьон туһа диэн эйиэнэ, миэнэ диэн араарсыбакка, эппиэти эрэйбэккэ, харданы күүппэккэ, дьиҥ ис санааттан үтүө быһыы-майгы чаҕылхай туоһута. Бу буоллаҕа – хорсун быһыы, үтүө санаа холбоһуута.
Кинилэр кимнээҕий? Павлов Александр Михайлович, Пимонов Сергей Сергеевич, Петров Илья Николаевич, Пинигин Вадим Яковлевич, Ноговицын Саргылан, Протодьяконов Андрей, Тистяхов Гаврил.
Истиҥ, сэргээҥ, ааҕыҥ, киэн туттуҥ,махтаныҥ, кэпсээҥ.
«Саха сирэ», edersaas.ru саайтка анаан Наталья РУФОВА