Уопсастыба

Үтүө санаанан кынаттанан 

Бүгүн, бэс ыйын 17 күнүгэр, хайҕаллаах Хатаспытыгар үтүөкэн түгэн, кэрэ көстүү, мааны быһыы-майгы буолан ааста.

edersaas.ru

1961 сыл балаҕан ыйын маҥнайгы күнүгэр оскуола боруогун атыллаан, уон сылынан 1971 сыллаахха олох киэҥ аартыгар үктэммит оччолордооҕу уолаттар уонна кыргыттар, оттон күн бүгүн убаастанар, ытыктанар дьоһун дьон – эбээлэр, эһээлэр, хос эбээлэр, хос эһээлэр өйгө- санааҕа хаалар тэрээһини тэрийдилэр. Хатаспыт саамай киинигэр күөххэ сууламмыт, солконон суугунаабыт, кустук араас өҥүнэн суһумнаабыт «Күөх сирэммитигэр» искибиэргэ кэлээччилэргэ ыскамыайка оҥорторон бэлэх ууннулар. Олус дьоһун, эриэккэс оҥоһуулаах, оһуор-мандар киэргэллээх, лип-лап, модьу-таҕа көрүҥү кытта нарыны, дьиктини кытта  бэркэ дьүөрэлээбит Александр Ямов ис сүрэҕиттэн кыһаллыбыта көстөр. Кылаас оҕолоро бу тэрээһиҥҥэ суолта биэрэн, ис сүрэхтэриттэн сырдыгы, сылааһы баҕаран, кэлэр көлүөнэ ыччакка холобур буолан, уос номоҕор киирэр мааны майгылаахтарын көрдөрдүлэр.

Дьэ, кырдьыга да, кинилэр олохторун устата элбэх уларыта тутууну, өрө тахсыыны, түһүүнү, сорох сороҕор мөлтөх киһи ыһыктынан да кэбиһиэх мунуохха-тэниэххэ айылаах муҥкук түгэннэргэ бэриммэтэх бары дьоһун дьоннор. Кинилэр норуот хаһаайыстыбатын араас салаатыгар бэриниилээхтик үлэлээн, үүнэн-сайдан, салайааччы буолбуттар, талбыт идэлэригэр умсугуйан туран утаппыттыы айа-тута үлэлээн, үрдүк кирбиилэргэ тиийбиттэр, хайа да кэмҥэ быар куустан олорботохтор, муннукка-ханныкка анньыллыбатахтар. Ол кинилэр бары сахалыы мындыр толкуйдаахтарын, ийэ дойдуга бэриниилээхтэрин кытта быһаччы сибээстээҕэ мөккүөрү үөскэппэт. Кинилэр аныгы тиэхиньиктээн урукку тиэхиньикэҕэ тиийэ быһаарсар, оҥорор, баары тупсарар мындыр эр дьоннор, кинилэр аҕыйахтан элбэҕи таһаарар хаһаайкалар, төрүт ииһи өрө туппут, уруккуну билиҥҥини кытта сатаан сибээстиир иистэнньэҥнэр, кинилэр олордубуттара хамсыы-хамсыы тахсан, сылы туоруурга ас-үөл дэлэтэр саха далбардара. Били ырыаҕа ылланарыныы, «кимий диибин, кини дииллэр» диэбэккэ, кимнээҕин эттэххэ – Решетникова Лариса Михайловна, Решетников Анатолий Егорович, Леонтьева Любовь Николаевна, Саввинова Зоя Николаевна, Андреева Галина Егоровна, Чиряева Ирина Семеновна, Калининская Матрена Иннокентьевна, Горохов Петр Иннокентьевич, Осипова Марфа Ивановна, Громова Галина Егоровна, Ушницкая Людмила Павловна, Константинов Анатолий Федотович, Коркина Л.З, Давыдова С.П, Ксенофонтова Любовь Пантелеймоновна, Чинянова А.Н, Софронов М.С, Старостин В.Г.  


Биһиги, сахалар, айылҕаны кытта ыкса сибээстээхпитин бүгүҥҥү күн-дьыл туруга арылыччы көрдөрдө.  Дьонум-сэргэм ыраас санааны толоро кэлэллэригэр суунан-тараанан көрсүөм диэбиттии, ардахтаан ылла, күөҕү, сайыҥҥыны тупсарда, сибиэһэй да сибиэһэй салгынынан илгийдэ.

Маннык түмсүүлээх-сомоҕолоһуулаах үтүөкэн дьоммут баалларын тухары өлөн-охтон биэриэхпит суоҕа. Махтал буоллун Хатас орто оскуолатын алтыс выпуһугар.

«Саха сирэ», edersaas.ru cайтка анаан Наталья РУФОВА

Ааптар хаартыскалара

0
0