Бэҕэһээ, кулун тутар 22 күнүгэр, Саха тыйаатырыгар «Наара суох» испэктээкили көрө кэлбит дьон өссө биир үтүө түгэн сибидиэтэллэринэн буоллулар.
edersaas.ru
Бу күн «Үтүө санаа чорооно» («Чороон добра») Кэбээйи улууһуттан аҕалыллан, Горнай улууһугар туттарылынна. Биллэрин курдук, волонтер Антон Васильев көҕүлээһининэн, «Үтүө санаа чорооно» улуустарынан көһөрүллэ сылдьар. Чороон тиийбит улуустара болдьохтоох кэм иһигэр нэһилиэктэригэр, улуустарыгар ааксыйа ыыталлар. Ону туоһулаан, чороонҥо улуус уратытын бэлиэтиир эмблемалар иилиллэн иһэллэр.
Бу күннэргэ «чороонноох» кэбээйилэр улуус киинигэр, нэһилиэктэригэр кыаммат-түгэммэт, элбэх оҕолоох ыалларга аһынан-үөлүнэн, таҥаһынан-сабынан уо.д.а. олоххо-дьаһахха наадалаах табаардарынан көмөлөстүлэр. Барыта үс массыына ас-үөл, таҥас-сап тиэлиннэ.
Кэбээйи улууһун баһылыгын социальнай боппуруостарга солбуйааччы Алексей Татаринов сценаҕа тахсан, үтүө санаа холобурун тус холобурунан олоххо киллэрэ сылдьар Антон Васильевка ис сүрэҕиттэн махтанна.
Кэбээйи улууһун баһылыга Игнат Спиридонов Арассыыйаҕа ыытылла турар Үтүө дьулуур (волонтерство) сылынан: «Үтүөнү оҥорор ыарахан. Онон, үтүө санаа өссө да эргилиннин», – ааксыйа өрөспүүбүлүкэ үгүс улууһугар ыытыллан, үтүө дьыалалар өссө да оҥоһулла туралларыгар баҕарда.
«Үтүө санаа чороонун» туппут Горнай улууһун баһылыга Никита Андреев:
– «Үтүө санаа чорооно» ааксыйаҕа биһиги улууспут былырыын эмиэ кыттыһан турар. Дьокуускай куораттан тутан баран, салгыы Бүлүү улууһугар атаарбыппыт, онтон биир сылынан эргиллэн кэллэ. Ааксыйа олус туһалаах, иитэр-үөрэтэр суолталаах. Амарах санааланыы, кыаммакка көмөлөһүү саха киһитин төрүт хааныгар баар. «Ойуурдаах куобах охтубат» диэн бэргэн этиинэн салайтарар ааксыйа ситимин быспакка ыытылла турара хайҕаллаах.
Соторутааҕы дойду президенинэн өссө төгүл талбыт Президеммит Туһаайыы этиитигэр хамнас тиийинэн олорор кэмҥэ тиийиэхтээҕин бэлиэтээбитэ. Кырдьыга да, үлэлии-хамсыы сылдьар дьон кыамматтара, тиийиммэттэрэ олус хомолтолоох. Онон, «Үтүө санаа чорооно» ааксыйа улахан көмөлөөх дии саныыбын. Бары бэйэ-бэйэбитигэр болҕомтолоох буолуоҕун, кыһалҕалаах дьон аттыларынан ааһан хаалымыаҕыҥ.
Надежда ЕГОРОВА, «Саха сирэ» хаһыат, edersaas.ru
Виктор ЭВЕРСТОВ түһэриилэрэ