Атырдьах ыйын 27 күнүгэр А.Е.Кулаковскай аатынан норуоттар доҕордоһууларын дьиэтэ өрөспүүбүлүкэҕэ ойуур баһаардарыттан эмсэҕэлээбиттэргэ көмөлөһөр, өйөбүл буолар сыаллаах үтүө санаа бырайыагын тэрийэн ыытта.
Бэлиэтээн эттэххэ, норуоттар доҕордоһууларын дьиэтэ үтүө санаа аахсыйатын бастакы ытыыта буолбатах. Ойуур баһаардарын кэмигэр таҥас-сап, харчы хомуйбуттара уонна ретрохит кэнсиэрин тэрийбиттэрэ. Маныаха Саха сирин национальнай-култуурунай түмсүүлэрэ өрүүтүн да буоларын курдук, көхтөөх кыттыыны ыллылар, баһаар уотуттан эмсэҕэлээбиттэргэ уонна уоту утары үлэҕэ баҕа өттүлэринэн көмөлөһөөччүлэргэ 1,5 мөл.солк. суумалаах көмөнү оҥорбуттара.
Национальностар икки ардыларынааҕы «БлагоТворить: ВСЕМ миром» бырайыак олус баай ис хоһоонноох. Биир тиһиктээх билиэккэ Хотугу төрүт олохтоох норуоттар кыргыттарыгар аналлаах маастар-кылаастар, латиноамериканскай, аан дойду норуоттарын үҥкүүлэрин үөрэтии, кэнсиэр арааһа, «Мин үрдүбэр күн хаһан да киирбэт» киинэни көрдөрүү уонна бу киинэ режиссерун Любовь Борисованы кытта көрсүһүү тэриллибиттэрэ.
Үтүөнү оҥоруу, үтүө дьыалалар көмөҕө, өйөбүлгэ наадыйар кыһалҕалаах дьоҥҥо хараҥаҕа тыкпыт сырдык кэриэтэ буолаллар. Үтүө санаа бырайыагар бэйэтин кылаатын киллэрсибит хас биирдии киһи сарсыҥҥыга эрэли күүһүрдэр.
Биһиги бары кыттыбыт дьоммутугар — айар кэлэктииптэргэ, өрөспүүбүлүкэбит улуустарын уус-уран самодеятельностарын бэрэстэбиитэллэригэр, эстрада ырыаһыттарыгар, саҥа саҕалыыр ырыаһыттарга, Хотугу төрүт олохтоох норуоттар маастардарыгар, көрөөччүлэрбитигэр ыҥырыыбытын өйөөбүккүтүгэр ис сүрэхпититтэн махтанабыт. Аахсыйа кэмигэр хомуллубут үп ойуур баһаарыттан эмсэҕэлээбиттэргэ көмө быһыытынан ыытыллыа.
А.Е.Кулаковскай аатынан норуоттар доҕордоһууларын дьиэтин пресс-сулууспата