Судаарыстыбаннай-чааһынай бииргэ үлэлэһии бырагырааматынан Сыырдаах сэлиэнньэтигэр 240 миэстэлээх, аныгы ирдэбилгэ толору эппиэттиир, 3 500 кв. миэтэрэ иэннээх уһуйаан үлэҕэ киирбитэ.
Күн бүгүн 13 бөлөхтөөх уһуйаан таһаарыылаахтык үлэлии олорор. Манна 6 сахалыы, 6 нууччалыы, ону таһынан, логопедическай бөлөх бааллар. Оҕо билиини ыларын таһынан, эт-хаан, ырыа, үҥкүү өттүнэн сайдарыгар бары усулуобуйа тэриллибит.
Түөрт оҕолоох ийэ Аина Колесова: “Сыырдаах” уһуйаан “Капелька” улахан бөлөҕөр кыра оҕобут сылдьар. Уһуйааҥҥа балтараа сааһыгар барбыта. Маҥнай эргэ, кыараҕас оҕо саадыгар үлэлии олорбуттара. Былырыын 240 миэстэлээх таас уһуйаан үлэҕэ киирэн, усулуобуйа тупсан, үөрүүбүт муҥура суох. Бэйэм эмиэ тустаах уһуйааҥҥа иитээччинэн үлэҕэ киирбитим.
Уһуйааммыт кэмпилиэгинэн, үлэһиттэринэн толору хааччыллыбыта, логопедыгар, уйулҕа үлэһитигэр, эти-хааны эрчийэр уонна муусука салайааччыларыгар тиийэ бары бааллар, тус-туспа кэбиниэттээхтэр, саалалаахтар.
Оҕо баҕатынан араас куруһуоктар үлэлииллэр. Быйыл робототехника, кырачааннарга аналлаах аэробика дьарыга үлэлиэхтээх. Дьарык барыта босхо”, — диэн кэпсиир.
Ити курдук, баара-суоҕа үс сыл иһигэр Дьокуускай куорат сиригэр-уотугар “ВИС” тэрилтэ, уопсайа, 12 социальнай эбийиэги тутан үлэҕэ киллэрдэ. Онон урукку курдук түүннэри уочарат, 5-6 сааһыгар диэри путевканы кэтэһии суох.
Людмила ПОПОВА, “Саха сирэ” хаһыат, edersaas.ru