Улуу Кыайыыга анаммыт байыаннай параакка Дьокуускайдааҕы гарнизон, бэрээдэги араҥаччылыыр уорганнар, байыаннай-патриотическай кулууптар бэрэстэбиитэллэрэ, Дьокуускайдааҕы кадетскай оскуола иитиллээччилэрэ, орто сүһүөх оскуола үөрэнээччилэрэ кытыннылар.
Кыайыы Знамятын өрө тутан байыаннайдар, казактар пуолкалара сэлэлии хаамтылар.
Ыраах айанныырга көлөҕө туттуллар уонна анал дьарыктаах ыттар Кыайыы параадыгар 2016 сылтан кытталлар.
Байыаннай сулууспа5а анаан ыттары иитии, кинилэри дьарыктаан, араас кутталлаах уонна сэрэхтээх сорудахха илдьэ сылдьыы Аҕа дойдуну көмүскүүр сэриигэ үтүө түмүктэри көрдөрбүтэ. Түөрт атахтаах доҕоттор өстөөх тааҥкатын эһэргэ, наадалаах суругу тиксэрэргэ, байыаннай сэби-сэбиргэли тиэйэргэ, кыргыһыы кырыктаах хонуутуттан бааһырбыт дьону таһаарарга, саҥа сири чинчийэргэ, иитиллибит миинэни буларга күүс-көмө буолаллара.
Дьокуускайга ыттаах дьон колуоннатын тэрийээччи Ольга Калачикова-Яковлева: «Бүгүҥҥү параакка уопсайа 46 түөрт атахтаах доҕотторбут: саха лаайкалара, Аляскатааҕы маламуттар, Сибиир хаскилара, илиҥҥи-европейскай уонна ньиэмэс, Швейцария овчаркалара кытыннылар. Кинилэри балтараа ый дьарыктаабыппыт, онон биһиги ыттарбыт киһи хамаандатын истэллэр. Дьарыгы уонна үөрэҕи овчаркалар түргэнник ылыналлар эрээри, үксэ хаһаайын ытын кытта хайдах кэпсэтэриттэн, киниэхэ хайдах сыһыаннаһарыттан улахан тутулуктаах. Хас биирдии боруода бэйэтэ тус-туһунан күүстээх уонна кыахтаах өрүттээх, ону таба көрөн сайыннарыахха наада. Дьиэни, уһаайбаны харабыллыыр уонна булка сылдьар ыт тус-туһунан.
Холобур, биһиги дьиэ кэргэн түөрт атахтаах доҕотторбутун Бүлүүгэ кустуу барарбытыгар илдьэ сылдьабыт. Кинилэр ытыллыбыт куһу эндэппэккэ булан ылан, ууттан таһааран биэрэллэр», — диэн кэпсиир.
Марианна ТЫРТЫКОВА, «Саха сирэ» хаһыат, edersaas.ru
+1
+1
+1
+1
+1
+1
+1