Бу күннэргэ батсаапка төҥүргэстэн хатыҥ үүнэн тахсыбыт хаартыската тарҕанна.
edersaas.ru
Үлэлии олордохпуна, арай батсаабынан тус бэйэбэр ол дьиктитик үүммүт хатыҥ аттыгар Мэҥэ Хаҥалас улууһун уопсастыбынньыктарын түмэр Уопсастыбаннай сэбиэт салайааччыта Зиновий Игнатьев кэргэнинээн түспүт хаартыскалара тиийэн кэллэ.
— Ити эн «хатыҥыҥ» эбит дуу? Батсаабы «бараата» дии? — диэн ыйыппыппар, Зиновий Иванович бэйэтин дьикти «хатыҥын» туһунан маннык кэпсээтэ:
— Бу хатыҥы мин өссө былырыын өйдөөн көрбүтүм. Быйыл дьиэ кэргэнинэн — оҕолорбутун уонна сиэннэрбитин кытта хос эһэбит Уйбаан Брызгалов өтөҕөр тахсан оттоотубут. Бу сири бырааппыт бэйэтин аатыгар оҥорторон ылбыта. Онон былырыыҥҥыттан биһиги аймах онно оттуубут. Бу хатыҥы оҕо сырыттахпына ийэм төҥүргэстэн үүнэн тахсыбытыттан дьиибэргээн, ыҥыран ылан көрдөрбүтэ да, оччолорго улаханнык аахайбатаҕым. Ол хатыҥым маннык улааппытын көрөн, былырыын көрөн баран, соһуйбутум аҕай.
Быйыл биһиги халыҥ аймах ыччаттарын мунньан, өбүгэлэрин өтөҕүн көрдөрдүм, кинилэр тустарынан кэпсээтим.
Дьиктитэ баар, өтөхпүт аттыгар төҥүргэстэн эрэ буолбакка, мас орон иһиттэн кытта үүммүт хатыҥнар бааллар.
Онон ыччаттарбытын кытта төрүт хаан-уруу дьоммутун кэриэстээн, өбүгэ өтөхтөрүн аттыгар үүммүт хатыҥнарбытыгар, сирбитигэр-уоппутугар анаан сүгүрүйэн кэллибит, — диэн кэпсиир Зинович Иванович.
Батсаап ситимигэр дьон өссө хоһоон айбыттара тарҕана сылдьара сөхтөрдө. Олус да бэркэ хоһуйар буолар эбиттэр!
***
Чөҥөчөктөн үүммүт хатыҥ
(Өбүгэ өтөҕөр)
Чөҥөчөктөн үүммүт хатыҥ
Бигэргэттэ өс хоһоонун:
Чахчы — Өтөх төҥүргэстээх,
Сурт кэриэстээх», — диэн кырдьыктаах !
Төҥүргэстэн саҥа хатыҥ
Үөскээн — төрөөн тахсыбытын
Ааҕыҥ үтүө илдьитинэн,
Өбүгэҕит бэлэҕинэн.
Кимтэн кииннээх, хантан хааннаах,
Ааттаах — суоллаах, сирдээх — уоттаах
Буоларгытын саныыргытын
Бэлиэтээбит махтанарын.
Алҕаатаҕа: Салгыы туруҥ
Силис сиргит кутун — сүрүн
Үтүргэннээх саҥа үйэ
Дьалхааныгар бэриммэккэ!
Лидия АНДРОСОВА, 29. 07. 2019. Төҥүлү, «Таммахтар».
Ити курдук, ытык сирдэри анаан кэриэстээн, Ийэ айылҕа оту-маһы дьиктитик үүннэрэрин бу төҥүргэс үрдүгэр уонна мас орон иһигэр үүммүт хатыҥнар туоһулууллар.
Елена ПОТОЦКАЯ, «Саха сирэ» хаһыат, edersaas.ru
Хаартыска — Зиновий Игнатьев дьиэтээҕи архыыбыттан.