Быһыыны ылбатах дьоҥҥо коронавирус дьаҥа ыараханнык киирэрин туһунан өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ. Ааспыт сууккаҕа өрөспүүбүлүкэ үрдүнэн 141 киһи коронавирустаан балыыһаҕа киирбит, ол иһигэр 32 оҕо.
«Балыыһаҕа киирбит дьонтон үгүстэрэ быһыыны ылбатахтар, саастаах дьон буолаллар, ону тэҥэ, быһыыны ылар бырааптара суох (медотвод) дьон эмиэ бааллар. Билигин ыарыы үрдээһинэ кэккэ улуустарга баар, ол да буоллар, сүрүн хонтуруол киин куоракка ууруллар», — диэн кини быһаарар. Доруобуйа харыстабылын систиэмэтэ ыалдьыбыт дьону эмтиир сөптөөх үлэни күүскэ ыытар.
Үтүөрэн тахсааччы ахсаана элбиир. Сууккаҕа 2403 киһи, оттон бэҕэһээ 1521 киһи үтүөрбүт. Быһыы бастакы кэмпэниэнин 576 737 киһи ылбыт, улахан дьон ылыыта 80,4 %-ҥа тэҥнэһэр. Оттон быһыыны ыларга болдьохторо туолбуттартан (ревакцинация) 54 %-ра ылбыттар. «Быһыыны ылбыт дьон ыарыйдахтарына да чэпчэкитик аһараллар. Оттон быһыыны ылбатах дьоҥҥо ыараханнык киирэр, ону 4 нэдиэлэлээх анаалыс бигэргэтэр», — диэн Ольга Валерьевна быһаарар. Санатар буоллахха, тохсунньу 28 күнүттэн оҕолорго быһыыны биэрии саҕаламмыта. Өрөспүүбүлүкэҕэ оҕолорго аналлаах 720 дозаҕа эппиэттиир «Спутник М» вакцина аҕалыллыбыт. Билиҥҥи туругунан 88 оҕо быһыыны ылбыт.
Хаартыскаҕа Андрей Сорокин (СИА) түһэриитэ