Доруобуйа Уопсастыба

Төрүттэр бэйэлэрэ фельдшердэннилэр

Тыа сиригэр олорор дьиэ тиийбэт уонна сибээс быстар мөлтөх буолан, эмчит тиийбэтэ —  улуус аайы баар кыһалҕа.

Өймөкөөн улууһун Төрүт нэһилиэгин олохтоохторо улуус баһылыгар уонна оройуоннааҕы балыыһа салалтатыгар хас көрсүһүү, мунньах  аайы туруорсар боппуруостара — амбулаторияны бырааһынан хааччыйыы.

«Доруобуйа харыстабыла» национальнай бырайыак чэрчитинэн мэдиссиинэ тэрилтэлэрин каадырдарынан хааччыйыы    муниципалитет баһылыга Иннокентий Сивцев уонна оройуоннааҕы балыыһа  кылаабынай бырааһа Ираида Харлампьева  төрөөбүт улуустарыгар үлэлии кэлиэхтэриттэн сүрүн соруктарынан буолар. Ол түмүгэр бу күннэргэ  кылаабынай быраас Ираида Харлампьева Төрүт нэһилиэгин амбулаториятын үлэһиттэригэр уопуттаах фельдшер Саргылана Трофимованы билиһиннэрдэ.


—  Төрүт нэһилиэгин амбулаторията улууска биир тарбахха баттанар бастыҥ үлэлээх мэдиссиинэ тэрилтэтэ. Манна үлэлэригэр бэриниилээх, нэһилиэккэ ытыктанар уопуттаах сиэстэрэлэр үлэлииллэр. Олохтоохтор уруккуттан туруорсар буолан, эмчит олорор дьиэтин эрдэттэн «ууран» туруораллар. Бу күннэргэ нэһилиэккэ оптоволокно сибээһин лииньийэтин тардан, түргэн интэриниэт киирдэ. Балыыһа эминэн толору хааччыллыылаах, ирдэнэр вакцина кэлбитэ. Онон саҥа үлэлии кэлбит мэдьисиинэ исписэлииһигэр усулуобуйа олохтоохтук тэрилиннэ, — диэн бэлиэтээтэ улуус киин балыыһатын  кылаабынай бырааһа Ираида Харлампьева.

Елена ПОТОЦКАЯ, “Саха сирэ” хаһыат, edersaas.ru

 

Хаартыска: ааптар түһэриитэ.

0
0
Telegram @edersaas20