Өймөкөөн улууһун Төрүт нэһилиэгин ыччаттара кэпсээҥҥэ сылдьар көхтөөх дьон.
edersaas.ru
Нэһилиэктэрэ кыра, чөкө. Онон ханна ким туох кыһалҕалааҕын көрө-истэ сылдьан, муста түһээт, көрүөх бэтэрээ өттүгэр бүтэрэн-оһорон кэбиһэллэр. Түргэн-тарҕан оҕолорго үгүс дьон эрэнэр буолла. Ыччаттар бииртэн биир үтүө дьыаланы «хааһахтарыттан хостоон» иһэллэр. Биир оннук бүгүҥҥү аһымал аахсыйаларын туһунан ыччат лиидэрэ, история учуутала, нэһилиэк дьокутаата Сахаайа Григорьева маннык билиһиннэрэр:
— Сылаас күннэри туһанан, ахсыа буолан, соҕотох олорор кырдьаҕастарбытыгар анаан муус аннынан балыктаан аҕалан түҥэттибит.
Барҕа махталбын тиэрдэбин Төрүт эдэр ыалыгар, араас тэрээһиннэргэ сиэттиспитинэн кэлэн кыттар Александр уонна Айталина Атласовтарга. Александр уопуттаах балыксыт буолан, балык анаан мустар сиригэр илдьэн, өссө маастарыстыбатыгар уһуйан, үгүспүт өлгөм балыгы ылан үөрдүбүт.
Ол курдук, быйыл саҥа учууталлыы кэлбит эдэркээн Айна Иванова олоҕор аан бастакытын балыкка сылдьан, балык бөҕөтүн хаптаран үөрдэ.
Оттон Елена Слепцова оҕо эрдэҕиттэн балыксыт бэрдэ буолан, тэҥнээҕин булбата. Балыкпытын барытын мунньан, дьиэлэригэр олорор ытык кырдьаҕастарбытыгар бэлэх ууннубут.
Кыраттан да үөрүнньэҥ дьон махтаммыт мичээрдэриттэн кынаттанан, өссө да кинилэр санааларын көнньүөрдэр баҕабыт баһаам.
… Ити курдук Ийэ дойдуга бэриниилээх буолуу сылыгар Төрүт нэһилиэгин ыччаттара биир дойдулаахтарын үөрдэр үтүө дьыаланы оҥоро тураллар.
Елена ПОТОЦКАЯ, «Саха сирэ» хаһыат, edersaas.ru
Хаартыска — Сахаайа Григорьева тиксэриитэ.