Айсен Николаев тыа хаһаайыстыбатын сайыннарыы туһунан ыйааҕар саха сүөһүтүн ахсаанын 2024 сылга диэри үс тыһыынчаҕа, ыанар ынах ахсаанын биир тыһыынчаҕа тиэрдэр соругу туруорбута.
edersaas.ru
Ыйаах толоруллуутунан күүстээх. Кэлиҥҥи биэс сылга саха сүөһүтүн иитэр генопуонда тэрилтэтигэр уонна кини улуустардааҕы салааларыгар базаны тупсарыы үлэтэ күүскэ ыытылынна: аныгы ирдэбилгэ эппиэтттиир саҥа комплекстар, саҥа хотоннор итиэннэ типовой сайылыктар тутулланнар, төрүт сүөһүбүт иитиллэр усулуобуйата тупсарылынна. Маннык кыһамньы түмүгэр, төрүт сүөһүбүт ахсаана 1,5 төгүл элбээн, 2095 буолла!
Саха сүөһүтүн ииттиэн баҕалаах элбиир, онон күн бүгүн өрөспүүбүлүкэ 14 улууһугар, сүүрбэ нэһилиэгэр төрүт сүөһүнү иитэр хаһаайыстыбалар бааллар. Ити иһигэр, «Саха сүөһүтэ» генопуонда питомниктарыгар 760, тирэх хаһаайыстыбаларга 555, кэтэх уонна бааһынай хаһаайыстыбаларга 585 ынах сүөһү баар.
Раиса Сибирякова, «Саха сирэ» хаһыат, edersaas.ru