Таатта улууһун Туора Күөл орто оскуолатын оҕолоро улуустааҕы хабылык, хаамыска күрэхтэһиитигэр бастакы миэстэни ыллылар.
Туора Күөлтэн үс бөлөх араас саастаах оҕолорго бары миэстэлэһэн, уопсай хамаанданан эмиэ кыайыылаах тахсан кыайыы көтөллөннүлэр. Ол курдук бастакы бөлөххө 1 миэстэни Мичийэ Хаптагаева, 3 миэстэни Павел Алексеев, иккис бөлөххө 1 миэстэни Айгуль Прокопьева, 3 миэстэни Артем Васильев, үһүс бөлөххө 3 миэстэни Коля Бояров ыллылар.
Кыайыылаах хамаанда, бастакы миэстэни бэйэтин бөлөҕөр ылбыт Айгуль Прокопьева ийэтэ Луиза Егоровна Васильева санаатын үллэһиннэ:
— Оҕобут Айгуль бастакы кылааска үөрэнэр эрдэҕинэ учууталбыт Елена Гурьевна уонна тириэньэр Юрий Николаевич Аянитовтар хабылык, хаамыска курдук уустук эрээри олус интэриэһинэй остуол оонньуутугар талаанын таба көрөннөр, күн бүгүнүгэр диэри эрчийэн, араас таһымнаах күрэхтэһиилэргэ ситиһиилээхтик кытыннара сылдьаллар. Оҕобут умсугуйан туран дьарыктанан улууска куруук инники күөҥҥэ сылдьарыттан биһиги, төрөппүттэрэ, олус үөрэбит. Тириэньэрдэрбитигэр Елена Гурьевнаҕа, Юрий Николаевичка махталбыт муҥура суох. Өссө да элбэх көлүөнэ ыччаты кэрэҕэ, сырдыкка угуйаргытыгар баҕарабын.
Ульяна Захарова, edersaas.ru
Хаартыскалары Луиза Васильева ыытта.