Атырдьах ыйын 8 күнүгэр, Төрүт норуоттар аан дойдутааҕы күннэригэр, СӨ Хотугу сирин аҕыйах ахсааннаах төрүт норуоттарын таҥастарын быыстапката арылынна.
edersaas.ru
Быыстапка ««Сирэктэ» (сухожильная нить) Хотугу сир аҕыйах ахсааннаах төрүт норуоттарын таҥастарын лабораторията» эрэгийиэннээҕи уопсастыбаннай тэрилтэ тэриллиитин көрсө арылынна.
«Сирэктэ» эрэгийиэннээҕи уопсастыбаннай тэрилтэ СӨ норуодунай дьокутаата Елена Голомарева көҕүлээһининэн, Арктика сайдыытыгар уонна СӨ Хотугу сирин норуоттарын дьыалаларыгар министиэристибэ, Хотугу сир аҕыйах ахсааннаах төрүт норуоттарын ассоциациятын көҕүлээһиннэринэн тэриллибитэ.
«Сирэктэ» -–эбэҥкилэр, эбээннэр, чукчалар, дьүкээгирдэр уонна долганнар үгэс буолбут таҥастарын сөргүтүүгэ уонна үйэтитиигэ үлэлэһэр декоративнай-прикладной ускуустуба, уус-уран оҥоһуктар норуодунай маастардарын уонна учуонайдар — этнографтар, искусствоведтар, археологтар, культурологтар, филологтар холбоһуктара.
Быыстапкаҕа Анаабыр, Өлөөн, Эбээн-Бытантай, Аллараа Халыма, Орто Халыма, Алдан, Усуйаана, Өлүөхүмэ, Эдьигээн улуустарын үлэлэрэ көрдөрүллэр. Бу экспозициияҕа кэлбиттэр өссө Хотугу сир аҕыйах ахсааннаах норуоттарын уһулуччулаах худуоһунньуктара: дьүкээгир худуоһунньуга уонна суруйааччыта, СӨ култууратын үтүөлээх үлэһитэ Николай Курилов, РФ үтүөлээх худуоһунньуга, СӨ норуодунай худуоһунньуга Юрий Спиридонов уонна Аллараа Халыматтан дьүкээгир эдэр худуоһунньуга Екатерина Суржанинова үлэлэрин билсиэхтэрэ.
Елена Голомарева:
«Билигин хайыы үйэ урукку маастардарга реестр оҥоһуллар. Кинилэр үлэлэрин хаартыскаҕа түһэрэн, түмэллэргэ үйэтитэргэ кыһаллабыт. Мин санаабар, өрөспүүбүлүкэ Хотугу норуоттар култуурунай нэһилиэстибэлэригэр олус улахан болҕомтону уурар», -– диэтэ.
Тэрийээччилэр куорат олохтоохторун уонна ыалдьыттарын Национальнай ойуулуур-дьүһүннүүр түмэлгэ (Киров уул. 9) атырдьах ыйын 21 күнүгэр диэри Хотугу сир дьиктилээхэй нэһилиэстибэлэрин кытары билсэргэ ыҥыраллар.
Надежда ЕГОРОВА, «Саха сирэ» хаһыат, edersaas.ru