Төрүт кырдьаҕастарыгар — тэйиччиттэн аахсыйа-бэлэх (Видео)

Ааптар: 
Бөлөххө киир:

Бүгүн Улуу Кыайыы күнүн Өймөкөөн улууһун Төрүт нэһилиэгин ытык кырдьаҕастара — 5 тыыл бэтэрээнэ, 11 сэрии оҕото хаһааҥҥытааҕар да өрө көтөҕүллэн көрүстүлэр.

Төһө да ардахтаах, хаардаах күн буоллар, дьиэлэриттэн тахсан, кинилэри эҕэрдэлии кэлбит бырааһынньыктааҕы автохолуоннаны көрөн, бэтэрээннэр олуһун үөрдүлэр. Орто көлүөнэ дьон «Эрэл» уонна ыччаттар түмсүүлэрэ массыыналары, матассыыкыллары киэргэтэн, «Бу тиэргэҥҥэ Төрүт бэтэрээнэ олорор» диэн бырааһынньыктааҕы тэйиччиттэн аахсыйа-бэлэҕи тэрийдилэр.

Кырдьаҕастар үөрүүлэриттэн соһуйан да, долгуйан да, ытамньыйан ыллылар. Ыччаттары кытта бэтэрээннэр тапталлаах «Катюшаларын», «Хайыһардарын» ылластылар, бырааһынньыктааҕы бэлэх туттулар, махтал тылларын иһиттилэр.

«Коронавирус сыстыганнаах дьаҥын кэмигэр дьиэҕэ хаайтаран олорор дьон тиэргэммитигэр тахсан, сибиэһэй салгынынан тыынан, тэйиччиттэн таптыыр ырыаларбытын ылластыбыт. Кыра кыым да саҕа үөрүү киһи санаатын кынаттыыр, дууһатын угуттуур. Онон оҕолорбутугар түгэн булан, бырааһынньыктааҕы настарыанньаны бэлэхтээбиттэригэр барҕа махталбытын тиэрдэбит«, — диэн сэрии кэмин оҕото Акулина Егорова санаатын тиэртэ.

Оттон ыаллыылар, тыыл бэтэрээннэрэ Афанасий Десяткин уонна Мария Кондакова таптыыр «Хайыһардаһарын» нэһилиэк орто саастаах дьонун «Эрэл» түмсүүтүн кытта тэҥҥэ ыллаһа олордулар. «Түгэнинэн туһанан, улууспут баһылыгар Иннокентий Сивцевкэ тыыл бэтэрээннэригэр уһулуччу болҕомтотун иһин махтанабын. Киниттэн күндү бэлэҕи — саха маанылаах иһитин тутан, санаалыын көнньүөрэн олоробун. Кэскиллээх ыччат- салайааччы кырдьаҕастарын өрүү итинник истиҥник өйдүү-саныы сырыттын«, — диэн тыыл бэтэрээнэ Мария Кондакова санаатын тиэртэ.

Орто саастаахтар икки массыынаны киэргэтэн, былакаат арааһын суруйан кырдьаҕастар тиэргэннэригэр сылдьыбыт буоллахтарына, ыччаттар матассыыкылларыгар олорон, сөмөлүөт макетын оҥостон, байыаннайдыы таҥнан, олох 1945 сыллааҕы Улуу Кыайыы кэмин төнүннэрдилэр. Кинилэр бэтэрээннэрэ (ыаллыы тиэргэнинэн үллэстибиттэр) олбуордарыгар тахсан, эдэр саастарын ырыаларын истэн, Кыайыы сырдык дьаралыгар куустардылар. Ити курдук, төрүттэр биир дойдулаахтарыгар бырааһынньыктааҕы настырыанньаны бэлэхтэрин кытта ууннулар.

Елена ПОТОЦКАЯ Саха сирэ хаһыат, edersaas.ru

+1
0
+1
0
+1
0
+1
0
+1
0
+1
0
+1
0