Аҕыйах хонуктааҕыта Арассыыйатааҕы үөрэҕи уонна науканы хонтуруоллуур федеральнай сулууспа салайааччыта Сергей Кравцов төрөппүттэри кытта көрүстэ. Саха сирин төрөппүттэрэ манна эмиэ кытыннылар.
edersaas.ru
Саха сирин төрөппүттэрэ, уопсай мунньахха, Үөрэх хаачыстыбатын мониторинныыр киинтэн холбоннуллар. Манна биир кэлим эксээмэн (ЕГЭ), 9-с кылаастар түмүктүүр аттестацияларын, бүтүн Арассыыйатааҕы бэрэбиэркэлиир үлэ, үөрэх хаачыстыстыбатын, о.д.а. үөрэххэ сыһыаннаах тиэмэлэри таарыйдылар.
Сергей Кравцов иһитиннэрбитинэн, бүтүн Арассыыйатааҕы бэрэбиэркэлиир үлэ саас 4-6 уонна 11 кылаас үөрэнээччилэригэр, онтон алтынньыга биология уонна химия биридимиэттэригэр (10-с кылаас) үөрэх хаачыстыбатыгар национальнай чинчийии ыытыллар.
Төрөппүттэр сүрүннээн эксээмэн туһунан туоһуластылар. 11-с кылаас үөрэнээччилэригэр омук тылыгар биир кэлим эксээмэн булгуччулаах биридимиэт быһыытынан 2022 сылтан эрэ киириэҕин эттэ. Онтон историяны булгуччулаах эксээмэн кэккэтигэр киллэрэр дуу, киллэрбэт дуу туһунан өссө ырытыһыахпыт диэтэ.
Ону таһынан, төрөппүттэр эксээмэҥҥэ ханнык босуобуйанан бэлэмнэнэр ордугун, аармыйаҕа сылдьан эксээмэни хайдах туттарыахха сөбүн, доруобуйаларыгар хааччахтаах оҕолорго көрүллэр уратылар туһунан интэриэһиргээтилэр.
Итини сэргэ, национальнай өрөспүүбүлүкэлэр үөрэнээччилэрэ тылынан эксээмэни кыайан туттарыахтара дуо диэн туоһуластылар. Маныаха ФИПИ (федеральный институт педагогических измерений) дириэктэрэ Оксана Решетникова эрэгийиэннэргэ сэһэргэһии ураты ньыматын киллэрэр былааннамматын быһаарда итиэннэ долгуйарга төрүөт суоҕун эттэ.
Санатан эттэххэ, Сергей Кравцов төрөппүттэри кытта бу үһүс көрсүһүүтэ. Арассыыйа араас муннугуттан барыта 2 тыһыынчаттан тахса ыйытыы киирдэ.
Людмила ПОПОВА, “Саха сирэ” хаһыат, edersaas.ru
Хаартыска: СӨ Үөрэҕин уонна наукатын министиэристибэтин саайтыттан.