Олунньу 7 күнүгэр Бүтүн Россиятааҕы “Төрөппүттэр биир кэлим эксээмэни (БКЭ) туттарар күннэрэ” акция биллэриллибитэ. Ити күн Россия 50 регионугар төрөппүттэр эксээмэн туттарыахтара. Үөрэҕи уонна науканы кэтээн көрөр федеральнай сулууспа салайааччыта Сергей Кравцов, акцияҕа тус бэйэтинэн кыттыаҕа.
Людмила Попова, “Саха сирэ” хаһыат, https://edersaas.ru/
Акцияны регионнар ый иһинэн тэрийиэхтээхтэр. Олунньу 6-8 күннэригэр СӨ үөрэҕин уонна наукатын үлэһиттэрин улахан мунньаҕын чэрчитинэн, Дьокуускайга төрөппүттэр эксээмэни олунньу 8 күнүгэр туттарыахтаахтар. Итиэннэ аҥардас акция эрэ быһыытынан барбакка, төрөппүттэргэ туһалаах буоллун диэн, “ГИА-2017 биир кэлим иһитиннэрэр күн” биллэрилиннэ. Тэрээһин сүрүн сыалынан – төһө кыалларынан төрөппүттэргэ эксээмэн туһунан сиһилии иһитиннэрии.
“Үөрэх хаачыстыбатын кэтээн көрөр киин” уопсай үөрэхтээһиҥҥэ бырагырааматын судаарыстыбаннай түмүктүүр аттестацияны хааччыйыыга салаатын начальнига Наталья Тимофеева:
“Быйыл оскуоланы бүтэрээри сылдьар оҕолоох төрөппүттэр бэйэлэрин баҕаларынан кэлэн, биир кэлим эксээмэни туттарыахтара. БКЭ-ҥэ хас биирдии оҕоттон ирдэнэр бэрээдэги барытын ааһыахтара. Кэтээн көрөр камералар, тимири көрдүүр тэриллэр эҥин барыта баар буолуохтара. Хас биирдии төрөппүт оҕотун туһугар “ыалдьар”. Эксээмэннэр чугаһаан истэхтэрин аайы, долгуйаллара өссө күүһүрэр. Ол долгуйуулара, айманыылара оҕолоругар бэриллэр. Ол иһин төрөппүт бэйэтинэн кэлэн, ирдэнэр бэрээдэги илэ-хараҕынан көрдүн-иһиттин, этинэн-хаанынан биллин уонна эксээмэн кэнниттэн түмүк оҥостон, оҕотугар көмөлөстүн, кэпсээтин диэн ити курдук акция ыытыллар. Эксээмэни оҕолор 3 чаастан ордук олорон суруйаллар. Оттон төрөппүттэргэ, 40 мүн устата толороллоругар анаммыт садаанньа кэлэр. Хас төрөппүт кыттара чопчу бэнидиэнньиккэ биллиэҕэ”, — диэн иһитиннэрдэ.
Тэрээһин олунньу 8 күнүгэр Дьокуускай куорат, Ленин проспегын 3 №-дээх, “Үөрэх хаачыстыбатын кэтээн көрөр киин” ГБУ дьиэтигэр буолар.
Бырагыраамата:
10.00-11.00 — “Төрөппүттэр БКЭ туттарар күннэрэ” акция (115-с хос)
11.15-12.30 — пресс-конференция (209-с хос)
14.30-16.00 — ГИА боппуруостарынан төрөппүт өрөспүүбүлүкэтээҕи мунньаҕа (ОГЭ уонна БКЭ), ВПР, НИКО (чат-конференция)
16.30 – 18.00 – ОГЭ уонна БКЭ, ВПР ыытыы, тэрийии боппуруостарыгар уопсастыбаннай үлэ (115-с хос). Ити ыйыллыбыт эксээмэннэр тула оҕолор, төрөппүттэр ыйытыыларыгар хоруйдуохтара.
Людмила Попова, “Саха сирэ” хаһыат, https://edersaas.ru/
Хаартыска интернеттэн ылылынна.