Саха сиригэр Бүтүн Арассыыйатааҕы биэрэпис салҕанар. Биэрэпис түмүгүнэн, демографическай, социальнай, экэнэмиичэскэй дааннайдар түмүллэн, чопчуланыахтара.
Судаарыстыба ыытар бэлиитикэтигэр оҕолоох дьиэ кэргэттэри өйөөһүн инники күөҥҥэ турар. Ол иһин элбэх көмө, өйөбүл миэрэлэрэ бааллар.
Статистика көрдөрөрүнэн, өрөспүүбүлүкэҕэ демографическай балаһыанньа тупсар. 2020 сылга барыта 13 097 оҕо төрөөбүт, 2019 сылга – 12 807 оҕо. Бу оҕолор 40%-ра – элбэх оҕолоох ыалларга төрөөбүттэр.
2019 сылы кытары тэҥнээтэххэ, үгүс улуустарга, куораттарга төрөөһүн эбиллибит. Ол курдук, Дьокуускайга – 4586, Мииринэйгэ – 727, Нерюнгригэ – 703, Мэҥэ Хаҥаласка – 572, Бүлүүгэ – 436, Хаҥаласка – 423, Ньурбаҕа — 413, Сунтаарга – 391, о.д.а. оҕо төрөөбүт.
Тоҕо эрэ уолаттар кыргыттардааҕар элбэхтэр эбит – 2020 сылга 6658 уол, 6439 кыыс төрөөбүт. Саха сиригэр төрөөһүн өлүүнү куоһарар, нэһилиэнньэ уопсай ахсаана 4016 киһинэн эбиллибит.
ЗАГС управлениета иһитиннэрбитинэн, 2021 сыл 9 ыйыгар 9001 оҕо (4441 кыыс, 4560 уол) төрөөбүт. Онон Саха сирэ Уһук Илин эрэгийиэнигэр төрөөһүн уонна нэһилиэнньэ эбиллиитин көрдөрүүлэринэн бастаан иһэр. Биллэн турар, манна “Демография” национальнай бырайыак миэрэлэрэ улахан оруоллаахтар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru