Бу күннэргэ Өймөкөөн улууһун Төрүт нэһилиэгин баһылыга Владимир Алексеев «НПО Импульс» ХЭУо салайааччыта Георгий Тирону кытта «Славкаҕа» болдьоһон көрүстэ.
Баһылык Владимир Алексеев бу көрсүһүү туһунан маннык кэпсээтэ: —Быйыл Төрүккэ
оптоволокно сибээһэ киирэр тэрээһин боппуруостарын ырыттыбыт. Бу ыйга «НПО Импульс» ХЭУо үлэһиттэрэ Төрүккэ кэлэн сибээс барар остуолбаларын ханан туруорары үөрэтэ кэлиэхтэрэ. Кулун тутарга Бадарааҥҥа уонна Славкаҕа ВОЛС подстанцияларын туруоруохтара. Онтон салгыы биһиэхэ кэлэн оптоволокно линиятын киллэриигэ үлэлиэхтэрэ. Бу күннэргэ оптоволокно ситимигэр холбонор баҕалаах дьонтон сайаапка хомуйуохпут. Георгий Георгиевич Төрүт нэһилиэнньэтэ аҕыйах буолан, тэрилтэҕэ эбии уустуктары үөскэтэрин үрдүнэн, социальнай бырайыак быһыытынан өйүүбүт диэн анаан бэлиэтээтэ. Төрүккэ киирии суолга түөрт 8-9 миэтэрэ мас остуолбалары туруоруохтаахпыт. Исписэлиистэр олунньуга кэлэн үөрэтиилэригэр оптоволокно ааһар күөллэрдээх сиригэр туоратыыны эмиэ көрүөхтээхтэр. Баҕар онно эмиэ остуолбаны туруоруу наада буолуон сөп. Бу боппуруоһу субуотунньугунан быһаарыахпыт. Дьаһалта салалтата көлөнү (тыраахтар) көрүөҕэ. Быйыл оптоволокно сибээһин сүрүн тэрилин дьаһалта дьиэтигэр туруоруохтара. Онтон сыыйа анал подстанцияны туруордахтарына, Бадараантан, Славкаттан, Төрүттэн — үс сиртэн холкутук кэпсэтэр кыахтаныахпыт. Ыстаансыйа турдаҕына, нэһилиэкпитигэр эбии Мегафон уонна МТС курдук сотовай сибээс оператордара кытта киириэхтэрэ. Ити былааҥҥа турар. Онон бастаан оптоволокно сибээһин киллэрэр соруктаахпыт. Сайаапканы хомуйууну ватсабынан биллэриэхпит. Онон төрүттэр оптоволокно линията олоххо киирэрин эрэнэ кэтэһэллэр.
Елена ПОТОЦКАЯ, «Саха сирэ» хаһыат, edersaas.ru