Бу күннэргэ ойуур баһаара Өймөкөөн улууһун Төрүт нэһилиэгэр киирэр кутталланан, киин куораттан быыһааччылар этэрээттэрэ кэлэн үлэлии сылдьар.
От ыйын саҥатыттан ойуур баһаарын умуруорууга олохтоох нэһилиэнньэ сүрүннээн бэйэтин күүһүнэн тахсан үлэлиир. Ыксаллаах кэмҥэ дьахталлар тэҥҥэ сылдьан, эмиэ күүс-көмө буоллулар. Төрүттэргэ улуус кииниттэн баһаарынай массыына, көмүс хостуур «Бадараан» учаастактан уу баһар массыына көмөлөстүлэр. Улуус кииниттэн икки мобильнай биригээдэ кэлэн үлэлээн барда.
Улуус баһылыга Иннокентий Сивцев бу уустук кэмҥэ нэһилиэк олохтоохторугар буола турар балаһыанньаны, туох быһаарыы ылылларын барытын сиһилии быһаара, иһитиннэрэ олорор.
Ойуур баһаара саҕаланыаҕыттан күн бүгүҥҥэ диэри сылдьар Төрүт нэһилиэгин олохтооҕо, бэрэстэбиитэллээх уорган дьокутаата Виталий Атласовы кытта кэпсэттим.
— От ыйын саҕаланыаҕыттан нэһилиэк эргин бара турар баһаардарга барытыгар сырыттым. Ол онтон саамай улаханнара – Водомеркаҕа буолбут баһаар этэ. Бу маннык күүстээх, кутталлаах баһаары олохпор көрө иликпин: суоһа да, күүһэ да, түргэнэ да сүрдээх этэ. Онно Төрүттэн төрдүө, бэйэлэриттэн үс киһи — сэттиэ буолан умулларбыппыт. «Верховой» баһаар диэни төрөөн баран бу саҥа көрдүм. Тыала күүһэ бэрт буолан, тииттэн тииккэ ыстанан, соҕотохто тыа умайан таһыгырыыр эрэ тыаһа иһиллэр. Киһи да былдьаныах курдук. Сүрүн тэрилбит — күрдьэх уонна биэдэрэ. Бу күннэргэ баһаартан эмсэҕэлээбит ходуһа иэнин ыйан туран, Тыа хаһаайыстыбатын министиэристибэтиттэн көмө көрдөөтүбүт. Мобильнай биригээдэ тэрийэ сатыыбыт да, баҕалаах киһи суох. Устудьуоннары көмөҕө ыҥырдыбыт. Ардах түһэн, уоту умуллардыбыт дии санаабыппыт да, көрдүгэннээн, баһаар эмиэ өр күөдьүйэн тахсан кэллэ.
… Ити курдук Төрүт нэһилиэгин олохтоохторо бүгүн Дьокуускайтан кэлэ сылдьар 15 киһилээх быыһааччылар этэрээттэрин кытта ойуур баһаарын кытта охсуһа сылдьаллар.
Елена ПОТОЦКАЯ, «Саха сирэ» хаһыат, edersaas.ru
Наталья Каландарова, Елена Потоцкая хаартыскалара