Төрөөбүт тылы сайыннарыыга, харыстааһыҥҥа киирбит этиилэр үгүстэрэ тустаах былааҥҥа бигэргэннилэр
Өрөспүүбүлүкэбитигэр судаарыстыбаннай уонна официальнай тыллары сайыннарыыга сөптөөх үлэ өрүү ыытыллар. Холобур, былырыын “2020-2024 сылларга Саха Өрөспүүбүлүкэтигэр судаарыстыбаннай уонна официальнай тыллары сайыннарыыга уонна харыстааһыҥҥа” бырагыраамаҕа 56,5 мөл. солк. көрүллүбүтүттэн 55-һэ туһаныллыбыт (98 %). 2021 сылга бырагырааманан туох үлэ ыытыллыбытыгар уонна быйылгы сыллааҕы былааны быһаарсыыга СӨ Ил Дарханын иһинэн тылы сайыннарыыга Сэбиэтин мунньаҕа буолан ааста.
СӨ вице-премьерэ Сергей Местников быһаарбытынан, ааспыт сылга судаарыстыбаннай бырагырааманы үбүнэн хааччыйыы саҕаламмыт уонна көрүллүбүт үптэн 90 %-на үөрэх тэрилтэлэригэр төрөөбүт тылы үөрэтиигэ усулуобуйаны тэрийиигэ ыытыллыбыт. Ил Дархан Айсен Николаев сорудаҕынан 42 мөл. солк. кэриҥэ үп чуолаан үөрэтэргэ аналлаах бэчээтинэй уонна электроннай учуобунньуктары, посуобуйалары, дидактическай матырыйааллары сэргэ, саха уонна хотугу аҕыйах ахсааннаах норуоттар тылларынан аудио-кинигэлэри таһаарыыга ыытыллыбыт. Ити түмүгэр, 5-9-с кылаастарга саха тылын уонна 1-9-с кылаастарга саха литэрэтиирэтин учуобунньуктара уонна 1-4 кылаастарга дьүкээгир тылын учуобунньуга уонна «Букварь лесных юкагиров» посуобуйа 29 электроннай көрүҥүнэн таҕыстылар. Ону тэҥэ, 1-4-с кылаастарга саха тылын уонна 10-11 кылаастарга саха литэрэтиирэтин учуобунньуктарын бэчээтинэй уонна электроннай көрүҥнэрэ оҥоһуллан бэлэмнэниллибиттэр. Сергей Местников Саха сиригэр улуустарга, нэһилиэктэргэ тылы сайыннарыыга уонна харыстааһыҥҥа судаарыстыбаннай бэлиитикэни олоххо киллэриигэ төһүү күүһүнэн муниципальнай тэриллиилэр буолаллар уонна, ити үлэ хайысхатын өссө күүһүрдүөхпүт диэн быһааран биэрдэ.
Ыччакка, оҕолорго уонна төрөппүттэргэ төрөөбүт төрүт тылы сайыннарыыга, үөрэтиигэ сүрүн үлэ информацияны маассабайдык тарҕатар сириэстибэлэр көмөлөрүнэн ыытыыга болҕомто ууруллуоҕа. «Саха» НКИХ бииргэ үлэлииргэ баҕалаах структуралары кытта тэлэбиидэнньэҕэ уонна интэриниэт симигэр тылы үөрэтиигэ оҕолорго аналлаах контены оҥорон саҕалаан эрэрэ махталлаах дьыала.
Сэбиэт чилиэннэрэ тылы сайыннарыыга, харыстааһыҥҥа научнай өттүнэн күүскэ үлэлииргэ, тылы өйүүргэ аналлаах пуонданы тэрийэргэ, уо.да.а. этиилэри киллэрдилэр. Тылы сайыннарыыга Сэбиэт үлэтин былаана киирбит этиилэри кытта учуоттаныллан бигэргэннэ.
СӨ Ил Дарханын уонна Бырабыыталыстыбатын пресс-сулууспата