Үөрэх үлэһиттэрин Тохсунньутааҕы мунньаҕын иитинэн төрөөбүт тыллары үөрэтэр “Төрүт тыллар” порталы сүрэхтээтилэр.
СӨ үөрэҕи сайыннарар уонна идэ таһымын үрдэтэр институт дириэктэрэ Ньургун Павлов “Төрүт тыллар” портал “СӨ судаарыстыбаннай уонна официальнай тылларын харыстааһын уонна сайыннарыы” судаарыстыбаннай бырагыраама иитинэн олоххо киирбитин бэлиэтээтэ. Платформа билигин оробуочай эрэсииминэн үлэлиир. СӨ Үөрэҕин уонна билимин министиэристибэтин бирикээһинэн операторынан тустаах институт анаммыт. Порталы “АА” уонна “Айверс” ХЭУо оҥорбуттар.
“Айверс” ХЭУо генеральнай дириэктэрэ Виктор Иванов портал тиэхиньиическэй өттүнэн үлэтин билиһиннэрдэ. Онтон көрдөххө, платформа нууччалыы уонна сахалыы тылынан үлэлиир, оҕо уруогу көрбүтүн-көрбөтөҕүн, толорбутун учуутал барытын кэтии олорор эбит. Аны тус-туспа кылаастарынан арахсар, биир кэрэхсэбиллээҕэ диэн уус-уран айымньыны ааҕалларыгар чиҥэтэ таарыйа сыанаҕа турбут испэктээги эмиэ көрөр кыахтаахтар эбит.
СӨ үөрэҕи сайыннарар уонна идэ таһымын үрдэтэр институт нуучча, саха тылларын кафедраларын исписэлииһэ Василиса Шишигина платформа ис хоһоонун туһунан кэпсээтэ. “Саха тылын учууталлара портал арылларын күүппүппүт ыраатта. Кууруска кэлэн куруук баҕа санааҕытын этэр этигит. Ону учуоттаан, иллэрээ сыл ыраахтан олорон үөрэнии саҕаламмытыгар портал оҥоһуллара ирдэнэр диэн бырайыак оҥорбуппут.
Биһиги платформабыт бастатан туран, үөрэнээччилэргэ ананар. Оҕолор уруокка тугу өйдөөбөтөхтөрүн көрүөхтэрин, баар сорудахтары толоруохтарын, тургутуктарынан бэйэлэрин бэрэбиэркэлэниэхтэрин сөп. Оҕо сынньалаҥар да аналлаах матырыйаал баар. Киинэлэри, испэктээктэри да көрөр кыахтаахтар уонна оҕо тылын саппааһын байытарга видео устуулары оҥорор табыгастаах.
Иккиһинэн, төрөппүккэ көмөлөөх. Төрөппүт платформа нөҥүө оҕотугар көмөлөһүөн, тугу үөрэтэллэрин билсиэн, бэйэтэ даҕаны билиитин хаҥатыныан сөп. Ол иһин төрөппүккэ аналлаах бэсиэдэлэр, төрөөбүт тылы үөрэтиигэ сүбэлэр-амалар баар буолуохтаахтар.
Үсүһүнэн, учууталга аналлаах. Платформаҕа презентациялары, суруйааччылар сэдэх хаартыскаларын, араас табылыыссалары, схемалары салгыы киллэриэхпит, портал ис хоһоонун байытан иһиэхпит”, — диэн билиһиннэрдэ.
Күн бүгүн Нам, Амма, Бүлүү, Чурапчы улуустара бэрт уруоктары оҥорон ыыталаабыттар. Онон билиҥҥитэ бу ааттаммыт улуустар уонна куорат оскуолаларын күүстэринэн, уопсайа, 90-ча уруогу, презентацияны киллэрбиттэр. Ол курдук, Р.Н. Каженкин (“Айыы Кыһата” гимназия), В.С. Кривошапкина (Харбалаах оскуолата), С.И. Еремеева (Чурапчы орто оскуолата) хас даҕаны уруогу, кылаас таһынааҕы үлэҕэ матырыйаалларын, үлэ бырагыраамаларын киллэрбиттэрин ордук чорботон бэлиэтээтэ.
“Соҕурууҥҥулар курдук манна үлэлэһэр халыҥ хамаанда суох. Онон учууталлар урукку курдук матырыйааллары бары түмсэн мунньарбыт ирдэнэр”, — диэн Василиса Романовна ыҥырда.
Учууталлар уһун кэм устата кэтэспит былаһааккалара үлэлээн эрэриттэн үөрэллэрин, элбэх уруок, көмө матырыйаал, тылдьыттар баар буоллаллар диэн санааларын биллэрдилэр.
Людмила ПОПОВА, “Саха сирэ” хаһыат, edersaas.ru