Эрдэ иһитиннэрбиппит курдук, Былатыан Ойуунускай аатынан Саха тыйаатырын икки испэктээкилин «Саха» Национальнай көрдөрөр-иһитиннэрэр хампаанньа биэриилэригэр көрүөхпүт.
edersaas.ru
Ону таһынан тыйаатыр айар кэлэктиибэ Төрөөбүт тыл, сурук-бичик дэкээдэтин чэрчитинэн сонун бырайыактары бэлэмнээтэ.
Олунньу 13 күнүгэр киэһэ 20.30 мүнүүтэҕэ «Саха» НКИХ ханаалыгар «Алампа таптала» диэн Саха тыйаатырын уонна Олоҥхо тыйаатырын холбоһуктаах кэнсиэрэ буолуоҕа. Ону таһынан «Үрүҥ туллук эрэ мөлбөстүүр» хоһоонунан дьүһүйүү (онлайн-таһаарыы) эмиэ Анемподист Софроновка-Алампаҕа ананыаҕа. Өссө биир литературнай биэчэр, «Кэхтибэт кэрэкэ тылларым» онлайн-таһаарыы олунньу 17 күнүгэр көстүөҕэ. Эмиэ бу күн араадьыйаны истээччилэр М.Байджиев «Махтанабын эйиэхэ» испэктээкили билсиэхтэрэ.
Тыйаатыр туруорууларын ахтыбыт көрөөччүлэр олунньу 16 күнүгэр тыйаатыр үс үлэтин араас ханаалынан билсиэхтэрэ. Холобур, Семен Курилов «Ханидуо уонна Халерхаа» испэктээкилин онлайн-таһаарыынан көрөөччүлэргэ санатыахтара, М.Горькай «Тимир Баасса» туруоруутун «Саха» НКИХ ханаалыгар көрдөрүөхтэрэ уонна СӨ үтүөлээх артыыската Софья Сергучева-Баранова «Уһуктуу» араадьыйа-испэктээгэ боллҕомтону тардыаҕа.
«Уһуктуу» дырааманы «Кыһыл көмүс» мааска бириэмийэ лауреата Сергей Потапов туруорбута. Бу треш-дыраама араас элеменнэрдээх, режиссер ураты көрүүлэрдээх буолан, көрөөччүнү соһуппута, араас мөккүөрдээх кэпсэтиини таһаарбыта. Дыраамаҕа сэрии бэтэрээнэ бу орто дойдуттан арахса сатыыр. Ол эрээри, кинини туох эрэ тутара уонна кини дьайыыларыгар хас да киһи олоҕо тыктарыллан ааһар.
Тыйаатыр олунньу 25 күнүгэр И.Вилквист «Сүөһүлэр» испэктээкилин онлайн-сүрэхтэниитин былаанныыр.
Надежда ЕГОРОВА, «Саха сирэ» хаһыат, edersaas.ru